ZIKIR JASAÝDYŃ IZGILIGI

Fatıh Sultan Mehmedtiń ustazy Aqshemseddın (q.s.) bir eńbeginde bylaı dep jazady:

Abdýlla ıbn Abbas (r.anhýma) bylaı deıdi: «Alla pendelerine paryz etken árbir ǵıbadat úshin belgili bir shek qoıdy. Qandaı da bir (ruqsat etilgen) sebeppen oryndaı almaǵandardy keshirdi, úzirli sanady. Alaıda zikir budan tys. Óıtkeni Alla taǵala zikirge shek qoımady, aqyl-esi aýysqan adamnan basqa zikirdi tárk etken eshbir adamdy úzirli sanamady jáne: «...Turǵanda da, otyrǵanda da, jatqanda da Allany árqashan zikir et» (Nısa súresi, 103-aıat) dep buıyrdy.

Alla taǵalany zikir etý – barlyq izgiliktiń bastaýy jáne eń úlken amal. Zikir – júrektegi tatty ketirip, jarqyratyp, júrekten shaıtandy alystatady. Óıtkeni shaıtan adamnyń júregine sybyrlaý úshin keledi. Qul Allany eske alsa, shaıtan ketedi. Eger qul zikirdi tastasa, onyń júregi qataıady. Allany eske almaǵan júrek tastan da qatty bolady.

Alla taǵala «Ahzab» súresiniń 35-shi aıatynda: «...Allany kóp zikir etken erler men áıelderge Alla taǵala keshirim men úlken syı ázirledi», – deıdi. Qul zikir arqyly nápsisiniń jamandyǵy men qalaýynan arylyp, sol zikirdiń nury júregine ense, júregi tazarady. Osylaısha, zikir etýshi adam zikirdiń árbir deńgeıinde eshbir kóz kórmegen, eshbir qulaq estimegen jáne eshbir pendeniń júregine jetpegen jánnat nyǵmetteriniń dámin tatady.

Paıǵambarymyz (s.a.ý.) bylaı deıdi: «Jer betinde Allanyń jánnaty bar. Oǵan kirgen adam, tipti, Fırdaýs jánnatyna da ańsary aýmaıtyn bolady». Sahabalar: «Ýa, Allanyń Elshisi! Ol ne?» - degende, Rasýlýllah: «Allaǵa degen mahabbat pen júrektiń Allany zikir etýmen tynyshtyq tabýy», - dep jaýap berdi.

Taǵy bir hadıste: «Kimde-kim jánnat baqtarynan paıdalanǵysy kelse, Alla taǵalany zikir etýdi toqtatpasyn», - dep aıtylǵan.

Degenmen, bul jaǵdaı júrek Allany zikir etý arqyly ǵapyldyqtan oıanyp, tazaryp, qulshylyǵymen qulpyra túsken kezden bastap paıda bolady.