Jarynyń namysyn qorǵaǵany úshin berilgen syı
Kezekti bir dárisinde ataqty tápsirshi ǵalym, sheıx ál- Nablýsı myna áńgimeni aıtyp berdi:
«Kóptegen jyl buryn Damaskidegi «Jamıǵýl ýard» (Gúlzar meshiti) ımamy bolǵan ustazymyz, ataqty sheıx bizge basynan ótken myna oqıǵany aıtty: «Birde túsimde Paıǵambarymyzdy (s.ǵ.s) kórdim. Ol maǵan: «Pálenshe degen adamǵa baryp, menen súıinshi aıt: «Ol jánnatta meniń dosym bolady», – dedi. Men oıanyp alyp, qaıran qalyp: «Meniń túsim – aıan tús.Paıǵambarymyz (s.ǵ.s) kirgen tús aqıqat. Ol kim ekenin surap bileıin», – dep sheshtim.
Erteńinde jamaǵattan ol kisi jaıly surap, kim ekenin, qaıda turatynyn bilip aldym. Sóıtsem, qarapaıym jemis-jıdek satýshy eken.Men bir jaǵynan tań qalyp, qyzyǵyp, al bir jaǵynan qatty ókindim... Qanshama jyl bilim alyp, dinde ǵalym bolyp, ımam bolsam da ol dárejege men emes, qarapaıym adam jetipti?! Onyń syry ne eken dep sol adamdy kórýge asyqtym.
Ol adammen jeke kezdesip: «Saǵan Alla elshisinen (s.ǵ.s) súıinshi bar! Biraq sol súıinshini alatyndaı, jasaǵan amalyńdy, syryńdy maǵan aıtpaıynsha, súıinshini aıtpaımyn», – dedim.Ol maǵan: «Siz de ondaı bolsa, bul syrymdy eshkimge aıtpańyz, men ekenimdi eshkimge bildirmeńiz», – dep, menen ýáde aldy.
Sodan soń myna oqıǵasyn aıtyp berdi:
«Bir-eki jyl buryn úılengen edim. Áıelim úılengen soń, bes aıdan keıin bosanatyn bolyp qaldy. Iaǵnı, bala menen emes. Men ony talaq etýge de, abyroısyz etýge de aqym bar edi. Óıtkeni, ádildik men jaqta bolatyn. Sodan keıin bul jaǵdaıdy ekeýimiz jasyrdyq ta, áıelim eshkimge kórsetpeı bosandy.
Jańa týǵan sábıdi qundaqtap orap, tań namazyna meshitke barǵanda, kórsetpeı ala baryp, meshittiń bosaǵasyna qoıyp qoıdym. Imam namaz oqyp biterde, sábı qatty jylady. Jamaǵat namazdan soń sábıdi qaýmalap turǵanyn kúttim. Olar: «Bul bala kimdiki? Kim tastap ketti? Tastandy bala», – dep shýlap jatyr. Sol kezde men baryp: «Bul balany Alla rızalyǵy úshin men asyrap alaıyn. Alla bergen eken», – dedim.Jamaǵat rızashylyǵyn bildirip jatty.
Osylaısha men birinshiden, sot ta, memleket te men jaqta tursa da, áıelimniń abyroıyn qorǵadym. Ekinshiden, saýaptan úmit etip, jetim balany asyrap alǵan edim. Sol meniń syrym», – dedi.
Men oǵan «Rasýlalla (s.ǵ.s) seni jánnattaǵy meniń dosym bolady» dep súıinshilegenin jetkizdim».
Alla Taǵala Quran Kárimde: «Negizinde Alla ádiletti, ıgilikti jáne aǵaıynǵa qaraılasýǵa buıyrady...», – dep baıandaıdy. Bul jerde sol adam «ádiletti» oryndasa, áıelin talaq eter edi. Biraq ol «ıgilikti» oryndady.Áıelin keshirip, balany asyrap aldy. Iaǵnı, ıgilik, jaqsylyq ádiletten ústem bolýymen ǵana osy qoǵam buzylmaı turady»,-dedi.
Qýat Qabdolda
