Jánnattyń quny – maıda tıyndar

Búgingi kúnniń eń sońǵy sabaǵy bitip, qońyraý shalynýǵa jaqyn qalǵan-dy. Oqýshylar kitap, dápterlerin jınap, qońyraýdy sabyrsyzdana kútýde edi. Qońyraý úni estilisimen barlyǵy esikke qaraı asyqty.

Álı jaılap jınalyp eń sońǵy adamnyń synyptan shyǵýyn kútip, kóziniń astynan muǵalimine bir qarap qoıady. Muǵalim de bul kidirisin baıqap tur.
– Álı, sen úıińe qaıtpaısyń ba?
Álı eń sońǵy oqýshy shyǵýyn kútip jaýap qatty.
– Sizben sóıleseıin dep edim, aǵaı 
– Jaraıdy, ne aıtpaqshy ediń tyńdaıyn.
– Synyptaǵy Ahmet dosym bar ǵoı.....
– Iıa, ne boldy Ahmetke?
– Ol... ol biz úziliste býfetke baryp bir narseler alyp jep júrsek, bizden qashqaqtap uzaq júredi, shamasy aqshadan qınalyp júredi ǵoı deımin.
– Iıa, solaı ma?
– Men oǵan járdem etsem dep edim, biraq ol meniń bul isimdi bilse, namystanyp qabyl etpeýi múmkin, men maıda aqshalarymdy jınap aptasyna bir sizge berip tursam, siz Ahmetke bere alasyz ba?

Ol qaltasynan bir ýys maıda aqshalaryn shyǵaryp, muǵalimniń ústeliniń ústine qoıdy. Muǵalimi aqshaǵa tıispeı, oryndyǵyna otyrdy. Álı týraly oılana bastady. Onyń bilýinshe, onyń bul úzdik oqýshysynyń jaǵdaıy da Ahmettiń jaǵdaıynan alys emes edi. Ol bir aýqatty januıanyń balasy emes edi. Nıeti netken keremet, dosyna kómekteskisi keledi jáne de muny jasyryn túrde jasamaq oıy bar. 

– Álı, tura tur, meniń bilýimshe, senderdiń januıalarynyń da jaǵdaıy asyp-tasyp turǵan joq, álde men qatelesip turmyn ba?
– Durys aıtasyz, muǵalim, ákem qara jumys jasaıdy, keıde jumys bolsa, keıde bolmaı qalady, Men de sabaqtan keıin aqsha tabý úshin amal jasaımyn.
– Ne jasaısyń ?
– Sabaqtan keıin shemishke satamyn.

Muǵalimi Álıdiń nıetiniń jaqsy ekenin biledi, biraq ózi qınalyp qalmasyn dep jáne oqýshysyn renjitip almas úshin ne isteý kerek ekenin oılana bastady. Onymen biraz sóılesse, múmkin, bul oıynan qaıtar dep oılady.
– Álı, sen keıin óskende kim bolǵyń keledi? - dep surady.
– Baı isker adam bolǵym keledi.
– Nege baı bolǵyń keledi?
– Kóp adamdarǵa kómektese alýym úshin.
– Álı, tyńda. Ahmettiń januıasynyń jaǵdaıy jaqsy emes bilem, biraq senderdiń de olardan aıyrmashylyqtaryn az. Sen oılan asyqpa, keıin baıyǵan kezde adamdarǵa kómektesseń bolmaı ma?
– Joq, bolmaıdy qazirden jasaýym kerek.
– Nege bolmaıdy?
– Úsh sebebi bar, muǵalim. Birinshiden, bul aqshalar meniki emes. Jaqsylyq jasaǵanym úshin Alla meni jaqsy kóredi, adamdarǵa da jaqsy kórgizedi. Sondyqtan janymdaǵy satýshylarǵa qaraǵanda adamdar menen shemishkeni kóbirek alady. Ekinshiden, «Aǵashty shybyq kezinen otyrǵyzý kerek» dep aıtady ǵoı. Kishkentaıymnan jaqsylyq jasaýdy úırenbesem, úlkeıgende ony úırený, jasaý qıyn bolady ǵoı. Úshinshiden, úlkeıgende baı isker adam bolǵym keledi. Ýaqytysynda saýda jasaı almaǵandar ondaı bola almaıdy. 

Muǵalimi Álımen qarsy aldynda úlken adammen sóılesip otyrǵandaı muqııat tyńdap otyr.
– Sońǵysyn jaqsy túsinbedim.
– Ol bylaı ǵoı, muǵalim. Qazir baı bolmaǵandyǵym úshin kúnine tek 1 stakan shemishkelik qana járdem ete alamyn. Budan kóp bere almaımyn. Al, Alla jánnatty qolynan kelgeninshe jaqsylyq istegenderge beredi. Qazirgi qolymnan kelgeni osy bolǵandyqtan, jánnáttiń baǵasy men úshin sondaı. Eger baıymaı ólip ketsem, 1 stakan shemishkeniń baǵasyndaı jaqsylyqpen jánnátqa kirem. Budan artyq qandaı saýda bolýy múmkin. 
Muǵalimniń kózi jasqa tolyp, basyn ızedi. “Túsindim” degen ısharaty edi onyń. Álıdi úıine qaıtardy. Ózi uzaq otyrdy. Keterinde Álıdiń ústel ústine qaldyrǵan tıyn-tebenin kórdi, ony ýysyna aldy. Oǵan qolynda dúnıeniń eń qymbat marjan, jaqut, almastaryn ustap turǵandaı sezildi.

Jo-joq, bul olardan da qymbat. Bul 1 stakan shemishkeden túsken maıda tıyndar – jánnátty satyp alatyn tıyndar edi. Bulardy qolyna qatty qysyp otyryp kóp jylady. Óz-ózine kelgende, aqsham ýaqyty bolypty. Synyptan jaılap shyǵyp «bul maıda tıyndarmen jánnátti satyp almaqshy», «bul maıda tıyndarmen jánnátti satyp almaqshy» dep qaıtalaı berdi. 

Mektep qaraýylynyń «ne deısiz?» degen suraǵyn da estimegendeı aýzy jybyrlap, aqsham qarańǵylyǵyna súńgip kete bardy.