Jánnatta úıiń bolsyn deseńiz...

Alla Taǵala Paıǵambarymyz (s.ǵ.s) jaıynda qasıetti Quran Kárimniń «Nájim» súresiniń 4-aıatynda: «Ol óz oıynan sóılemeıdi. Bul tek kókeıine salynǵan ýahı ǵana», – dep  eskertedi. Demek, Paıǵambar (s.ǵ.s.) sóziniń mańyzy men mánin tereń túsiný – musylmandar úshin eń mańyzdysy. Osy oraıda Paıǵambarymyzdyń (s.ǵ.s) bir hadısin sizdermen bólisýdi jón sanap otyrmyn.

Allanyń Elshisi Muhammed (s.ǵ.s) bir hadısinde bylaı dep buıyrady: «Kim túnde jáne kúndiz on eki rákaǵat súnnet namazyn kúndelikti jalǵastyrsa, Alla Taǵala jánnatta ol adam úshin bir úı turǵyzady».

Ábý Hanıfa mázhabynyń ǵulamalarynan Ál-Maýsılı «Ál-Ihtıar» kitabynda ol súnnet namazdary týraly bylaı jazady: «Tań namazynyń aldynǵy eki rákaǵat súnneti, besin namazynyń aldynǵy tórt rákaǵaty jáne sońǵy eki rákaǵat súnneti, aqsham namazynyń sońǵy eki rákaǵat súnneti men quptan namazynyń sońǵy eki rákaǵat súnneti».

Bir musylmannyń kúndelikti oqýy kerek bolǵan bes ýaqyt namazdyń súnnetteriniń barlyǵy on eki rákaǵat bolady eken. Jánnatta qonaqtaıtyn úıimizdiń kirpishin osy bastan  qalaý óz qolymyzda. Alla barshamyzǵa jánnattaǵy úıge kirýdi násip etsin. Ámın!

Isataı Berdalıev