JÁHANNAMNYŃ OTY ODAN DA QATTY

Jastaıynan bilimge qushtar, «qurmetti kúıeý bala» degen laqap atpen tanymal bolǵan Muhammed ıbn Súleımen degen kisi bolǵan eken. Túnimen maıshammen sabaq oqıtyn.

Bir kúni osylaı kitap oqyp otyrǵan kezinde bireý esigin qaǵady.  Beımezgil ýaqytta kelgen kim boldy eken dep tańyrqaıdy. Esigin ashsa, bir sulý ári órimdeı jas qyz tur. Qyz óziniń alys sapardan sharshap kele jatqanyn jáne osy úıdiń ǵana shamy janyp turǵanyn baıqaǵanyn, sol sebepti amalsyz kelgenin aıtady. Ne isteý kerek?! Árıne, úı ıesi jas  qyzdy tún jarymda kóshege qaldyra almady. Basqa qylar qaıran bolmaǵan soń úıine kirgizedi. Úıge kirgen soń jolaýshy qyzdyń qal-jaǵdaıyn surap, aldyna júrek jalǵar as qoıyp, qaıta sabaq oqýǵa kirisedi.

Úı ıesi sabaq oqyp otyryp, sulý qyz oıyn buza bastasa, dereý aldyndaǵy shamǵa saýsaǵyn kúıdirip, qaıta alyp, qaıta kúıdirip, oıyn basqa jaqqa aýdarǵysy kelip dal bolady. Sóıtip saýsaǵyn shamǵa qaıta-qaıta kúıdirip otyryp tańdy atyrady.

Tań atqan soń qyz úıden shyǵyp ketedi. Sóıtse, qyz sol eldiń patshasynyń bir ýáziriniń qyzy eken. Ýázirdiń saraıyndaǵy adamdar qyzdy kórisimen ony keshe túni boıy izdep tappaǵandaryn jáne din aman oralǵanyna tań qalǵandaryn aıtady. Qyz túnde bir jas jigittiń úıin amalsyz panalaǵanyn jáne sol túni bolǵan tańqalarlyq oqıǵany aıtyp beredi. Ákesi qyzyna qamqor bolǵan jas jigitti dereý saraıyna aldyryp, nelikten túni boıy saýsaǵyn shamǵa kúıdirip otyrǵanyn suraıdy. Júzi nurly jas jigit: «Jolynan adasyp, esigimdi qaqqan jolaýshyny kirgizbeýge amalym joq edi. Sol sebepti oǵan úıimnen oryn berdim. Túni boıy shaıtan meniń sanamdy sanǵa, oıymdy onǵa bólip arbaýmen boldy. Men eger ersi bir áreketke barsam, jahannamnyń oty budan da qatty bolady dep saýsaqtarymdy alma kezek otqa salyp kúıdirdim», - dep jaýap beredi.

Laýra Almahanova