ZEKETTIŃ HIKMETTERI
![](/img/articles/7f7bcdaec47cbfa2c76f59bd815f657c.jpg)
Paıǵambarymyz (s.a.ý.) bylaı deıdi: «Jer men teńizde mal, tekqana zeket bermeýdiń kesirinen qurıdy». (Sýıýtı, «ál-Jámıǵ ýs-Saǵır»)
Zeket Islam sharttarynyń biri. Hadıs sháripte: «Maldaryńdy zeketpen qorǵańdar, dertterińdi sadaqamen emdeńder. Páleket tolqynyn duǵa jáne jalbarynýmen qaıtaryńdar» - degen. Demek zekettiń arqasynda baılyq qorǵalady. Sadaqalar materıaldyq jáne rýhanı dertterge em bolady. Zeket pen sadaqa bergenderdiń maldarynda, jandarynda nur, saýlyq pen bereket áseri baıqalady. Sonymen qatar Alla Taǵalanyń rızalyǵyna qaýyshyp rýhanı kóp syıapatqa da ıe bolady ári rýhanı qaýipterden aman qalady.
Zekettiń túrli paıdalary bar. Mal qumarlyǵy adamnyń júregin túrli jamandyqtarǵa ıtermeleıdi. Zekettiń arqasynda júrektiń osy qaýipiniń aldy alynyp, nápsi sarańdyqtan tazaryp, adamda meıirimdilik, qaıyrymdylyq sııaqty qundy sezimder oıanady.
Zeket qoǵamnyń tynyshtyǵyna, keńshiligine sebep. Zeketin bergen baı muqtaj jandardyń qajetine jaraǵandyqtan olardyń mahabbatyna kenelip, duǵasyn alady.
Sonymen qatar zeket berý myqty senimniń nyshany. Jeke múliginen tek Alla rızalyǵy úshin zeket bergen, qaıtarymyn kútpegen adam basqasynyń múligine kóz tikpeıdi. Basqaǵa zııany tımeıdi.
Zeket raqmet aıtý mindeti. Zeket bergen musylman bylaı oılaıdy: «Osy baılyǵym Allanyń syıy. Myqty, kúshti, bilimdi qanshama adamda mundaı baılyq joq. Demek Alla Taǵalanyń osy syıynyń raqmetin aıtýym kerek». Mine osy raqmet aıtý zeket berý arqyly bolady.
Biri ıe bolǵan baılyǵyna aınalasyndaǵy qoǵamnyń da úlesi bar ekenin oılaý kerek. Eger ondaı qoǵamda ómir súrmegende mundaı baılyqqa keneler me edi. Qoǵam da bir nyǵmet. Bul nyǵmettiń shúkiri de zeket berý arqyly bolady.