Zeketin bergen hrıstıan hıkaıasy

Bir kúni Paıǵambarymyz (s.ǵ.s.) ózin qorshaı otyrǵan sahabalarǵa: «Zeket – qoldaǵy mal men baılyqtyń qorǵaýshysy, saqtaýshysy», – dedi. Dál osy mezet bir hrıstıan saýdager de aıtylǵandarǵa qulaq salyp tyńdap otyrdy. Paıǵambar sózin aıtyp bitirer-bitirmes álgi hrıstıan barǵan boıy malynyń zeketin beredi.

Sol ýaqyttar hrıstıan saýdagerdiń jaqyn dosy Mysyrǵa saýdamen jol tartqan edi. Ekeýi birge saýda jasaıtyn. Ol kezderde saýda úlken kerýendermen jasalatyndyqtan jol boıy qaraqshylardyń qarmaǵyna túsip qalý qaýpi joq emes. Hrıstıan ishinen bylaı dep oılady: «Eger Muhammedtiń aıtqany ras bolsa, men bergen zeketten dosym qaraqshylar quryǵynan aman-esen keledi, onda men de musylmandyqty qabyldaımyn. Al eger Muhammed jalǵan aıtyp jurtty aldaǵan bolsa, onda meniń dosymnyń saýdasy jol boıy qaraqshylardyń talan-tarajyna túsedi, onda men de qylyshymdy alyp Muhammedtiń sazaıyn beremin».

Bir ýaqytta joldaǵy kerýennen hat keledi. Hatta kerýenniń qaraqshylarǵa tap bolyp, bar dúnıe-múlikten aırylǵany jazylypty. Hattyń bas jaǵyn oqı sala hrıstıan birden qylyshyna qol júgirtip, jolǵa jınalmaq boldy. Biraq artynsha dosynyń: «Kerýenniń aldyńǵy jaǵyna qaraqshylar shabýyl jasap, bar mal-baılyqty tý- talapaı jasaǵanda, men kerýenniń sońynda edim. Maǵan eshteńe bolǵan joq. Bar mal-baılyǵymyzdyń esh shashaýsyz aman-esen kele jatqan jaıy bar. Alań bolma! Jaqynda baryp qalamyn» degen sálemdemesin alady. Budan keıin Paıǵambardyń aqıqat sóılep, ras aıtqanyna hrıstıan saýdagerdiń záredeı de shúbási qalmaıdy. Dereý Aqıyq elshiniń aldynda tize búkken kúıi: – O, Rasýlalla! – deıdi, – maǵan ıslamdy túsindir, ımanǵa keleıin.

Islam túsindirilgende, ol ıslam týynyń aıasynda adamzattyń eń tunyq bastaýy musylmanshylyqty qýana qabyldaıdy.

Qudaıberdi Baǵashar