Urlyqtan tyıǵan bir aýyz sóz

XVIII-XIX ǵasyrlarda ómir súrgen ataqty Bóltirik sheshenniń aýyldas bir turǵyny qartaıǵansha urlyǵyn qoımapty. Urlyq bolǵanda, bireýdiń usaq-túıek buıymyn jymqyryp kete beredi eken. Bir kúni túndeletip kórshi aýyldaǵy toıdan qaıtyp kele jatsa, álgi shal ushyraı ketedi. Ony tanyp qalǵan Bóltirik:

- Túndeletip neǵyp júrsiń? - dese, anaý:
- Jáı, ásheıin Bóteke, - dep qıpaqtaıdy.
- Arqalap alǵanyń ne?
- Qaýyn, qarbyz edi.
- Ony qaıdan aldyń?
- Myna aýyldyń qaýyny pisip jatyr eken, sodan ala saldym.
- Urlap alǵanyńyz jaramaıdy ǵoı, aqsaqal.
- Qarańǵy túnde kim kóredi deısiz...
- Appaq saqal qarańǵy túnde aıdaı kórinedi emes pe?
- Qap, myna sóziń óńmenimnen ótti-aý, endi qoıdym, qoıdym! - depti shymbaıyna batqan shal.

Sol-sol eken, álgi aqsaqal urlyq qylýyn pyshaq keskendeı qoıyp ketipti desedi el.