«Ýa, Alla! Itterińnen bir ıtińdi jiber!»
Paıǵambarymyzǵa (s.ǵ.s) degen dushpandyǵymen ataqty bolǵan Ábý Láháb óziniń uly Ǵýtáıbany da óziniń qózqarasy boıynsha tárbıelegen-di. Onyń Alla elshisine (s.ǵ.s.) degen óshpendiligi orasan bolǵany sonshalyqty, Ábý Láháb áıeli men balasyn da zulymdyqqa járdemshi etip, qaskóı áreketterine jumsap otyrǵan.
Qasıetti Quran Kárimniń «Másád» súresi dál osy Ábý Láháb pen áıeli Úmmú Jámıl jaıynda túsken bolatyn. Ǵýtáıba Paıǵambarymyzdyń qyzy Úmmú Kúlsúmmen úılenip, shańyraq kótergen bolatyn. Keıinnen paıǵambarlyq kelgen ýaqytta Alla elshisine degen qysastyqpen áıelin úıden qýyp jibergen pasyq adam edi.
Al, Paıǵambarymyzǵa (s.ǵ.s) Nájim[1] súresi túsken ýaqytta, Kaǵbaǵa baryp namazǵa turady da, Nájim súresin oqı bastaıdy. Muny estigen Ǵýtáıba birden «Nájimge de, onyń Rabbysyna da qarsymyn» dep aıqaılaı bastaıdy. Alla elshisi (s.ǵ.s.) namazyn jalǵastyra almaı, toqtap qalady. Qutyrynǵan Ǵýtáıba odan beter aýyr sózder aıtyp, kedergi keltirip baǵady. Paıǵambar (s.ǵ.s) oǵan til qatpaıdy. Keıin qaıtadan namazǵa turyp Nájim súresin oqı bastaǵanda qaıtadan aıqaılap, «Nájimge de, onyń Rabbysyna da qarsymyn» dep janynan ketpeı qoıady. Tipti, Alla elshisiniń (s.ǵ.s.) kıimin jyrtyp, oǵan qaraı túkirip jiberedi. Sonda paıǵambarymyz (s.ǵ.s) qolyn jaıyp: «Ýa, Alla! Mynaǵan ıtterińnen bir ıtti jiber», – dep duǵa jasaıdy.
Muny estigen ákesi balasyna: «Sen baıqap júrshi, Muhammed bir nárseni aıtsa týra keledi», – dep saqtandyrady. Birneshe kúnnen keıin Ǵýtáıba saýda kerýenimen Sham qalasyna jolǵa shyǵýǵa daıyndalady. Sonda ákesi balasyn qushaqtap: «Muhammedtiń aıtqany basyńa keler me eken dep qorqamyn. Sen osy saparǵa shyqpaı-aq qoıshy», – dep jylaıdy. Alaıda, Ǵýtáıba únemi shyǵyp júrgen saparymyz, eshteńe bola qoımas dep jolǵa shyǵady. Jolda seriktes jeti-segiz kisimen shól dalada, Sham qalasyna jaqyn Zarqa degen jerde túneıdi. Biraz ýaqyttan keıin baıqasa, ol jerde arystandar kóp eken. Sonda qoryqqan Ǵýtáıba «Muhammed Mekkede otyryp-aq meni óltiredi-aý» dep qaıǵyra bastaıdy. Janyndaǵylarǵa: «Eger men aman-esen tańdy atyrsam, senderge myń dınar beremin, meni qorǵańdar», – deıdi. Seriktesteri birden kelisedi de aınaldyra ot jaǵady. Jaý kelse, birinshi bizge keledi dep ózderi shet jaǵyna jatyp, Ǵýtáıbany ortaǵa jatqyzady. Túnniń bir ýaqyty bolǵan kezde, bir arystan kelip shette jatqandardy emes, týra ortada jatqan Ǵýtáıbaǵa sekirgen boıda basynan tistep, sýyryp alady da parshalap tastaıdy[2]. Alla elshisiniń qarǵys duǵasy osylaısha oryndalǵan bolatyn.
Ǵazız Ahmet
