«TEMEKI ShEKKEN ADAM EShQAShAN QARTAIMAIDY»

Ertede bir shaharda meıirimdi, dana qart ómir súripti. Kúnderdiń kúninde saýdagerler satý úshin shaharǵa temeki alyp kelipti. Shahar turǵyndary buryn kórmegen taýardy qyzyq kórip, saýdagerlerdi japyrlap qorshap alady. Saýdagerler:

– Keremet japyraq! Qudiretti japyraq! Barlyq aýrýǵa em bolady! Alǵan da armanda, almaǵan da armanda! Kelińder! Dámin tatyp kórińder! – dep jar salady.

Dana qart adam basyn aınaldyratyn osy bir ósimdikti jaqtyrmaı qalady. Ol jınalyp qalǵan qaýymǵa:

– Alyńdar! Bul «qudirettiń» basqa da paıdalary bar: temeki shekken adamnyń úıine ury túspeıdi, ıt qappaıdy jáne de ol eshqashan qartaımaıdy, – depti.

Saýdagerler qýanyp ketip:

– Aıtqanyńyzdyń bári ras. Biraq siz «qudiretti» japyraqtyń mundaı qasıetteri bar ekenin qaıdan bilip qoıdyńyz?! – dep tań qalady.

– Temeki shegetin adamnyń úıine ury túspeıdi, óıtkeni urylar túnde tynysh bolǵandy jaqsy kóredi. Al temeki shegetin adam túnimen kúrkildep jótelip uıyqtamaıdy. Kóp uzamaı temeki adamnyń densaýlyǵyn álsiretedi de, adam tez qartaıyp, taıaqpen júrýge májbúr bolady. Taıaqpen júrgen adamǵa qaı ıt jolasyn?! Ol adam eshqashan qartaımaıdy, sebebi jasyna jetpeı kóz jumady.., -depti.

Ańyryp qalǵan jurt oılanyp qalady…