Táýba namazy qalaı jáne qaı kezde oqylady?

Qate-kúnási úshin ıstıǵfar etip, keshirim tileýdi qalaǵan adam muqııat jáne babymen dáret alyp, táýbe nıetimen eki rakaǵat namaz  oqıdy. Sebebi, namaz – duǵa-tilektiń eń ulyǵy. Sondyqtan, namaz oqyp, táýbe suraý qup sanalady. Táýbe – mustahap namaz.

Ábý Bákir (r.a.) rıýaıat etken hadıste: «Men Alla Elshisiniń (s.ǵ.s.): «Kisi bir kúná jasap qoısa, dáret alyp namaz oqyp, Alla Taǵaladan keshirim surasa, álbette, onyń kúnási keshiriledi dep, «Ári olar jıirkenishti is jasasa nemese ózderine zulymdyq etse, Allany esterine alyp, kúnálary úshin keshirim tileıtinder. Kúnálardy Alladan basqa kim keshiredi? Ári olar istegenderin bile tura qasarysyp jalǵastyra bermeıdi. Mine, solardyń qaıtarym syıy – Rabbysynan keshirim jáne astynan ózender aǵyp jatatyn ári olar máńgi qalatyn baqtar. Amal etýshilerdiń syıy netken tamasha[1]» aıatyn oqyǵanyn estidim[2]», – delingen.

Túngi nápil namaz eki rakaǵattan, jup-jup etip tórteý, altaý oqyla beredi. Al, kúndizgi nápil namaz tórt rakaǵatty bir sálemmen oqysa ruqsat. Alaıda, eki rakaǵattan bólip oqyǵan abzal[3]. Abdýlla bın Omar (r.a.): «Túngi namaz eki-eki rakaǵattan oqylady[4]», – dep aıtqan. Sondaı-aq, táýbe namazyn tek eki rakaǵat oqysa da bolady.

[1] Álı Imran súresi, 135-136 aıattar.
[2] Ábý Daýd, Nasaı.
[3] Ý.Zýhaılı, Islam fıqh Entsıklopedııasy, 2-tom, 82-bet.
[4] Ahmed.