«Taqýalyq testi»

Birde qazynasyn qaıda kómgenin umytyp qalǵan kisi aqyr sońynda Imam Aǵzamnan jón surap barǵan eken. Imam Aǵzam Ábý Hanıfa: «Bul – fıqh máselesi emes. Degenmen, saǵan bir jolyn aıtaıyn. Tańǵa deıin namaz oqy, esińe túsedi», – dep keńes beredi. Álgi adam túnde namazǵa kirisedi. Kóp uzamaı qazynasyn qaıda kómgeni esine túsedi. Tez arada baryp, teńgesin taýyp alady. Tańerteń ımamǵa kelip alǵys bildirgen soń: «Túnde namaz oqysam, teńgemdi taýyp alatynymdy qaıdan bildińiz?» – dep suraıdy. Ábý Hanıfa sonda: «Shaıtan seni túni boıy namaz oqýyńa jol bermeıtinin bilgenmin. Allaǵa shúkirshilik etip, túndi tolyǵymen qulshylyqpen ótkizgeniń jón bolar edi», – dep jaýap bergen eken[1].

Baıqaǵanymyzdaı, shaıtan malǵun bizderdiń yqylaspen namaz oqýymyzǵa baryn salyp baǵady. Al, onyń belgileri qandaı?

Endeshe, taqýalyq testin júrgizip kórelik:

1. Namaz ústinde qulshylyqtan keıin ne isteý kerektigi jaıly oı kele me?

2. Namaz oqyp turǵanda, kúıbeń tirshilik mazalap, onyń sheshý joldary tabyla ma?

3. Quran Kárim aıattaryn oqyǵanda til kúbirlegenmen, júrekke jetpeı jata ma?

4. «Allahý Akbar», «samıa Allahý lımán hamıdah» dep tákbir men tahmıd aıtqanda maǵynasyn jiti túsinbeı aıtý ádetke aınalyp bara ma?

5. Namaz ústinde artyq qımyl-áreketter jasaısyz ba?

6. Qulshylyq kezinde kóz qıyǵymen oqyp turǵan jer men adamdardy muqııat kóresiz be?

7. Namaz oqyp turyp, esineısiz be?

8. Namaz ústinde janyńyzda sóılegen adamdardyń sózin anyq estip, ne jaıly ekenin ajyrata alasyz ba?

9. Jylap oqý áreketińiz sátsiz be?

10. Imam namazdy uzaq oqysa, ashýlanasyz ba?

11. Namaz rákaǵattary sanynan jańylysý jıilep ketti me?

12. Oqyp bolǵan soń, qaı súreni oqyǵanyńyzdy esińizge túsire almaıtyn kezder kezdese me?

13. Ár namazda bir-eki súreni qaıtalaý ádetińiz be?

14. Quptan namazyn oqyp bolǵanda, ıyǵyńyzdan aýyr júk túskendeı sezinesiz be?

Eger «taqýalyq testi» suraqtarynyń kóbine «Iá» dep jaýap bergen bolsańyz jaǵdaı qıyn. Bul – namazda yqylas joqtyǵyn kórsetetin belgiler. Is nasyrǵa shappaı jatyp, namazyńyzdy túzeńiz. Namaz túzelse, basqa sharýa retimen ońalady!

Rýslan Qambarov