Saq bolyńyz! Jasyryn kamera

Jalpy, búgingi qoǵam úshin jasyryn beıne kamera tańsyq emes. Kez kelgen mekemede beıne baqylaý ornatylǵan. Tipti, úıimizdiń esik aldyndaǵy nan satatyn dúken de kameramen jabdyqtalǵan. Árıne, maqsat – turǵyndardyń qaýipsizdigi. Sonymen birge, qylmystyń aldyn alý. Qala berse, oryn alǵan oqıǵanyń mán-jaıyn anyqtaý barysynda da kamera asa qajet.

Negizi, osy maqalany oqyp otyrǵan sizdi de jasyryn kamera túsirip tur. Bul túsirilim kóptep beri júrgizilýde. Siz ben bizdi syrtymyzdan túsirý úshin joǵary tehnologııalyq kamera qoldanylady. Beınesi – tunyq, dybysy – anyq.

Quran Kárimde: «Al, shyn máninde, senderdiń ústerińnen kúzetip turýshylar bar. Qurmetti jazyp turýshylar. Olar ne istep jatqandaryńdy biledi»[1], – dep, kameranyń bar ekenin eskertedi. Ol bizdiń árbir qımylymyzdy qalt jibermeıdi. Ári bir emes, eki kamera. Árbir adamǵa eki kameradan bekitilgen. Maqsat – qoǵamdaǵy árbir azamatty salaýattylyqqa shaqyrý.

Bul kóshedegi kamera sııaqty bir orynda qatyp turmaıdy. Jol boıyndaǵy kamerany aldaǵandaı, kóliktiń jyldamdyǵyn baıaýlatyp aldap ketý múmkin emes. Túsirý aýqymy 360°-ty qamtıdy. Quran Kárimde: «Mine, árbir adamnyń oń jaǵynan jáne sol jaǵynan eki tirkep alýshy otyr. Ol qandaı sóz aıtpasyn, onyń janynda daıyn turǵan baqylaýshy bar»[2], – dep eskertken.

Sondyqtan, qaı ýaqytta da abaı bolyńyz! Sebebi, jasyryn kamera tur.