Sahabalardy tań qylǵan jánnattyq adam kim?
Ánás ıbn Malık (r.a.) áńgimeleýde:
«Bir kúni Paıǵambarymyzdyń quzyrynda otyrǵan bolatynbyz. Kenet ardaqty elshi: «Qazir aralaryńyzǵa jánnattyq bir kisi keledi», – dedi. Sol-aq eken ansardan bir adam ishke endi. Álgi adamnyń saqalynan sý tamshylap turǵan bolatyn. Aıaq kıimin sol qolyna ustaǵan eken. Kelesi kúni Alla elshisi osy sózin taǵy da qaıtalady. Álgi adam dál keshegi keıipte taǵy da aramyzǵa kelip qosyldy. Úshinshi kúni de aıtyp aýyz jıǵansha, sol kisiniń tóbesi kórindi.
Úshinshi kúni meshittegi jamaǵat taraǵanda, sahaba Abdýlla ıbn Amr ıbn As (r.a.) álgi kisige jolyǵyp: «Men ákemmen janjaldasyp qalyp, úsh kún boıy janyna barmaıtyndyǵyma ant ettim. Sol sebepti meni úsh kún úıińde qonaq ete alasyń ba?», – dedi. Álgi kisi maquldaǵan keıip tanytty.
Abdýlla osydan keıingi jaıtty bylaı dep baıandaǵan:
«Álgi kisiniń úıinde úsh kún túnedim. Túngi ýaqyttarda bir ret te bolsyn táhájjýd namazyna turǵan joq. Tań namazyna deıin uıyqtaıtyn. Tek tóseginde ary-beri aýnaǵanda ǵana Allany eske alyp, tákbir aıtyp qoıatyn. Biraq aýzynan jaman sóz shyqqanyn estimedim. Úsh tún bitkesin: «Ákemmen aramda qandaı da bir renish joq bolatyn, Alla elshisi májiliste úsh kún boıy «qazir jánnattyq bir kisini kóresizder» degen saıyn aramyzǵa sen kelip qosyldyń. Men saǵan ádeıi qonaq bolyp, jasaǵan amaldaryńdy kórip, sol amaldardy jasaǵym kelgen edi. Shynyn aıtsam, sonshalyqty kóp ǵıbadat jasaǵanyńdy baıqamadym. Alla elshisi súıinshilegen bul mártebege qalaı jettiń?» – dep suradym. Ol bolsa: «Óziń kórgennen basqa qulshylyǵym joq», – dep jaýap qatty. Sóıtip qoshtasyp burylyp kete bergende sál kidirdi de: «Rasyn aıtsam, kórgenderińnen artyq asyp bara jatqan eshqandaı ǵıbadatym joq. Degenmen, júregimde eshbir musylmandy kóre almaý nıeti bolǵan emes. Ómir boıy eshkimge kek saqtamadym, qyzǵanbadym da», – dedi. Men sonda ǵana istiń mánin ańǵaryp: «Sirá, seni álgindeı mártebege jetkizgen osy qasıetiń bolar», – dedim».
