«Saǵyndym seni... Sultanym...»
Iá, Rasýlalla!
Iá, júrek sultany – ardaqty paıǵambarym!
Adamzatty mahabbatpen jaratqan Alla Taǵala olarǵa týra jol nusqaý úshin paıǵambarlar jiberip otyrdy. Olar Alla aldyndaǵy mindetin kórkem túrde atqara bilgen izgi elshiler edi. Al, sen – sol paıǵambarlardyń tóresisiń! Sen solardyń ımamy bolǵan aqıyq elshi ediń!
Alla Taǵala seni jiberý arqyly óziniń dinin kámil etip, nuryn támamdady. Seni adamzattyń asyly qylyp, kúlli álemge raqym etip jiberdi.
Adamzat bir máýeli aǵash bolatyn bolsa, sen sol aǵashtyń jemisi ispettisiń.
Sen kelgen ǵasyr adamzattyń nadandyq shyrmaýynda qalǵan túnek ǵasyry bolatyn. Sen Haqtyń meıirimi retinde sol túnekti nur bolyp túrgen ediń. Sen beıne bir aram shópter arasynda ósip shyqqan jupary ańqyǵan raýshan gúlindeısiń.
Sen týylǵan ǵasyr – zamananyń altyn ǵasyry. Seni tapqan ata-ana qandaı baqytty, senimen dos bolǵandar qandaı baqytty dos, saǵan jar bolǵandar qandaı baqytty jubaı, saǵan úmmet bolǵan qandaı baqytty úmmet!
Seni álemge raqym qylyp jibergen ulylardyń ulysy, meıirimdilerdiń meıirimdisi qandaı uly Jaratýshy!
Iá, ańsarym!
Myna álem Jaratýshy Uly sheberdiń ǵalamat kórmesi bolatyn bolsa, sen osynaý ǵajap kórmeniń keremetterin bizge jerine jetkize, júrekten ótkize túsindirip, Haqtyń ulylyǵyn tanytqan ustaz ediń!
Iá, parasat padıshasy!
Seniń ómir súrgen ǵasyryń kúlli adamzattyń saǵynyshy. Ózińe ǵashyq aqyn tilimen aıtar bolsam, seni súıgender saǵan rýhanı jaqyn bolýǵa sondaı yntyzar.
Sen dúnıege keler sátte ǵalam bir sát ishteı tynyp turǵan kez edi. Bári paıǵambardyń óz áýletinen kelýin tilep jatty. Biraq sen Allanyń dosy Ibrahımnen (a.s) taraıtyn qasıetti tekten shyǵyp, Abdýmýtalıbtiń shańyraǵynda shyr ettiń. Ardaqty atań seni kúlli álemde maqtaýly bolsyn dep atyńdy Muhammed qoıdy. Sen rasynda da maqtaýly bola bildiń.
Saǵan paıǵambarlyq mindet júktelmeı turyp ta sen quddy bir paıǵambardaı ediń. Adamdar seniń júzińnen senimdilik, meıirimdilik nuryn ǵana kóretin. Sen qarańdylyqta bolǵan halqyńnan jyraqqa shyǵyp, olar úshin duǵa tileıtinsiń. Sebebi, sen Haqtyń tańdaýy bola bilgensiń. Paıǵambarlyq aýyr mindetke tek óziń ǵana laıyqtysyń.
Basty ýaıymyń adamdardyń ımanǵa kelýi bolatyn. Osy jolda sen qan-josa bolsań da, nebir teperish kórseń de, shyr-pyr bolyp árkimniń esigin qaǵýmen boldyń. Bul saǵan Haqtan berilgen alyp mahabbat, mol meıirim edi.
...Alaıda, qaıdan shyqqany belgisiz keıbir aram nıettiler seniń kúlli adamzatqa úlgi bolǵan nurly da kirshiksiz ǵumyryńa kir juqtyrǵysy keletindeı. Sen Taıyftyqtarǵa aqıqatty úgittep barǵanyńda, saǵan qanypezerlerdiń tas jaýdyrǵany sııaqty qazirgi kúni de sondaı kisápirler túrli joldarmen saǵan tas atqysy keletindeı. Seni sol Taıyftyqtardan qorǵap, denesin tasqa tosqan sahabalaryńdaı bola almaǵanymyz bizdi qatty qynjyltady. Seni álemge laıyqty túrde tanyta almaǵan ókinish ishimizdi ottaı qaryp, shoqtaı kúıdirýde...
Biraq ondaı jaıttar seniń nurly shyraǵyńdy esh sóndire almaıdy. Kúnniń betin qansha qara bult tumshalaǵysy kelgenmen kúnniń jarqyrap turǵan nuryn shashpaı qoımaıtyny sııaqty seniń de nurly baıanyń qııametke deıin adamzatty shýaqqa bóleıtini aıdan anyq. Qandaı jaǵdaı bolmasyn sen ulylyq tuǵyryndasyń. Sebebi, sen Jaratýshy Jabbar ıeniń tańdaýlysy, adamzattyń abzalysyń!
...Qııamette de «úmmetim, úmmetim» dep oıanatynyń taǵy bar, sen ashabyńnyń kózderiniń nury, júrekteriniń sultany boldyń. Seniń ónegege toly ǵumyryń sol úmbetińniń baqytyna baǵyshtaldy.
Seniń ózderine degen mahabatyńdy sezindi me, ýaıymyńdy túsinýge tyrysty ma, qadirińdi sezingen sahabalaryń seni óz janynan da artyq súıetin. Rabbylarynan tilegeni – senimen jánnatta birge bolý edi. Olardyń keıbireýi seniń múbárak saqalyńdy sáldesine salyp júrdi, endi biri qalt etken sátti paıdalanyp, paıǵambarlyq mórińdi súıip alýǵa asyqty. Al endi biri ózin seniń shapanyńmen kebindeýin qatty qalady.
Iá, Sultanym!
Ashabyńnyń saǵan degen mahabbaty zor bolatyn. Olar sol arqyly Allanyń razy bolǵan quldary atandy.
...Men de Allama shynaıy qul, saǵan laıyqty úmbet bola aldym ba bilmeımin. Biraq mańdaıy sájdege tıgen Allanyń álsiz quly retinde, paıǵambarym dep saǵan til qatyp, saǵynyshymdy arnaımyn.
...Iá, adamzattyń gúlzary bolǵan ardaqty paıǵambarym! Saǵyndym seni!...
Jalǵyz men emes seni búkil álem saǵynýda.
Sen jaıly adamdardyń sózderinen, óziń jaıly jazylǵan kitaptardan estigenderim, oqyǵandarym meni eriksiz saǵan qaraı umtyldyrady. Men seni barlyq jaǵdaıda, ómirimniń barlyq sátinde izdeımin.
Tolyqsyǵan aıdaı bolǵan ımanymdy kúná degen qara bult jaýyp, kóńilimniń aq kóılegi kirlegende Alladan alystaǵanymdy sezinip beımaza kúı keshetinmin. Sondaı sátterde aınalamdaǵy adamdar maǵan kinálaǵan kózben qaraıtyndaı qatal bop kórinetin. Sol kezde meni janyna otyrǵyzyp, Alladan meniń júregimniń nurlanýyn tilep, ári maǵan Jaratýshynyń sheksiz qudirettiligin túsindirip ımanymnyń nuryn arttyrýyna sebep bolatyn ózińdeı meıirban jandy izdedim. Men sonda seni saǵyndym, Sultanym!
Ómir degen dańǵyl jol ǵoı. Sol qyzyǵy men shyjyǵy qatar keletin saparda talaılarmen úzeńgiles boldym. Keı adamdardyń meniń janymdy uǵa almaı, kóńilimdi jaralap, jylatyp ketkeni de boldy. Iá, meıirim paıǵambary! Men sol sátte ózińdeı abzal dosty izdedim. Kóńil kúzi qulazyǵan sondaı sátterde men seniń baýyryńa tyǵylyp, múbárak deneńdi pana qylǵym keldi. Basymnan sıpap, baýyryńa basyp, jubatqanyńdy qaladym. Men sonda seni saǵyndym, Sultanym!
Iá, Allanyń ǵalamǵa jibergen raqymy!
Men senimen qýanyshymdy da bóliskim keledi. Aınalamda Allanyń dinin pash etip, ózińniń súnnetińdi kıedeı kóretinder qanshama. Solardyń izgi amaldaryna súısinip, sonyń bárine senen súıinshi suraǵym kep turady.
Iá, Sultanym! Saǵyndym seni!
Seniń úmbetiń bolǵanyma Allaǵa sansyz shúkir deı otyryp, saǵan salaýat aıtyp, sálem joldaımyn!!! Jaratýshy Jabbar ıemnen meni ózine shynaıy qul qylyp, aqyrette seniń týyńnyń astynan kórinetin, saǵan laıyqty úmbet qylýyn tilep, duǵa qylamyn.
...Iá, Haqtyń súıiktisi! Saǵan sansyz salaýat arnaımyn!
Roman Burqash
