SABYR TÚBI – SARY ALTYN

Myna jalǵan dúnıede kez kelgen pendeniń basyna talaı qıyndyqtar men qaıǵyly jaǵdaılar keletini haq. Óıtkeni, ómirde qýanysh pen qaıǵy egiz tóldeı qatar júredi. Bul - ómirdiń ózindik zańdylyǵy da. Sebebi, ómir atty qıyn jol syndarly synaqtardan turady.

Sondyqtan, Alla Taǵala keı kezderi basymyzǵa qýanyshty da, qaıǵyny da bere otyryp, bizderdi aýyr synaqtardan ótkizedi. Uly Jaratýshy Quran Kárimde: «Sózsiz senderdi qorqynyshpen, ashtyqpen jáne de maldy, jandy ári jemisterdi azaıtý arqyly synaımyz, alaıda sabyr etýshilerdi súıinshile!» («Baqara» súresi, 155-aıat) deı kele adam balasyn ártúrli qıyndyqtarmen synaıtyndyǵyn baıandaıdy.

Demek, bul jalǵanda kez kelgen pende qaýip-qater, joqshylyq, tarshylyq, adam jáne mal shyǵyny syndy qıyn da qaıǵyly jaǵdaılarmen synalady. Degenmen, Alla Taǵala joǵarydaǵy aıattyń jalǵasynda qıyndyqtar aldynda ustamdy bolyp, sabyr etken jandardy zor saýap kútip turǵandyǵyn eskertedi.

Quran Kárimde jetpisten asa jerde sabyr jaıynda sóz qozǵalady. Sonymen qatar, Haziret Paıǵambarymyzdyń (s.ǵ.s.) múmınderdi sabyrlyqqa shaqyrǵan hadısteri de mol. Bulardyń barlyǵy Haq dinimizdiń musylmandardy meılinshe sabyrlyqqa úndeıtindigin kórsetse kerek.

Sabyr – qıyndyqtar men qaıǵyly jaǵdaılarda adam balasyna kúsh-qýat berip, basyn ıdirmeı, aıaǵyn nyq basýǵa kómekshi bolatyn erekshe qasıet. Adam balasy sabyr etý arqyly taǵdyr taýqymetiniń kez kelgen túrin jeńip shyǵýmen qatar, Jaratýshynyń syndarly synaǵynan da súrinbeı ótetini sózsiz.

Jazylmas dertke shaldyǵý, dúnıeniń qyzyǵyn tamashalar eki janaryńnyń nurynan aırylý – pendeniń basyna keletin aýyr jaǵdaılardyń biri. Degenmen, Jaratqannyń jazǵanyna razylyq bildirip, jalǵannyń qıyndyqtary men aýyrtpalyqtaryna sabyr ete bilý múmın pendeni kúmánsiz Allanyń súıispenshiligine bólep, aqyrette mol saýapqa keneltedi.

Farhat Isauly
«AQ MESHIT» meshitiniń ustazy