SÁBI KELDI
![](/img/articles/899f13c24a75d6cf9aad5dd0a6488a05.jpg)
Sonymen bala ińgálap jerge túsisimen syrttaǵy eki kózi tórt bolyp otyrǵan ákege, qalǵan erkekterge jelaıaq áıeldiń biri baryp qyz bolsa - "kesteshi", ul bolsa - "jylqyshy" dep habarlaıdy, súıinshi alady.
Aýyl-aımaq bul kúni bir jyrǵaıdy, óte-móte áıelder jaǵy. Súıinshini qolma-qol bermese, bara sala julyp alǵan tymaq pen kımeshek-shylaýyshty qashan alaryn alǵansha qaıtaryp bermeı, ata-eneniń basyn toqyraıtyp qoıady.
Sol kúni bir áıel balaǵa kindik sheshe bolady da, ol bosanǵan áıelge qalja ákeledi, jarys qazannyń bir jaǵynda onyń da qazany qaınap, kútimniń bir jaǵyn sol kóterip jatady.
Aldaǵy shildehanynyń júgine de ol ortaq bolýǵa mindetti. Balanyń áke-sheshesi munyń esesine onyń qalaǵanyn beredi.
Jaryq dúnıege kelgen sábıdi emizbesten buryn, qaınatylǵan taza sýǵa malynǵan qasqyrdyń nemese syrttannyń júnimen aýyzdandyrady. Jańa týǵan náresteni birinshi ret sabyndap shomyldyrady. Shomyldyrar aldynda tilin jutyp qoımaýy úshin balanyń tilin tartady.
Aldymen balany tóbesinen bastap jýady, odan soń sýdan shoshynyp qalmas úshin eki aıaǵyn batyryp, denesin úıretedi. Alǵash sýǵa túsirilgende sý tımegen jeri qalmaı, taza jýylýy qatty eskertiledi. Shomyldyrǵan soń kindik túbine qoıdyń maıyn jaǵyp, baılap, qundaqtap anasynyń janyna jatqyzady.
Jaras Kabıshev-tiń fbparaqshasynan