RÝHANI BAILANYSTYŃ JALǴASY
Bizdiń elimiz ejelden túrli mádenıetter men órkenıetterdiń toǵysatyn ortalyǵy bolyp tabylatyndyǵy tarıhı shyndyq.
Osy turǵydan alǵanda, kóptegen ǵasyrlar boıy ártúrli halyqtar men senimderdiń rýhanı murasynan nár alǵan halqymyz tózimdiliktiń, kelisimniń jáne ózara syılastyq sııaqty baǵa jetpes qasıetterdi boıyna sińire bildi.
Qazaqta «Otany birdiń – tilegi bir, tilegi birdiń júregi bir» – degen qanatty sóz bar. Júzi basqa bolsa da júregi bir, tili basqa bolsa da tilegi bir, dini basqa bolsa da Otany bir qanshama ulttar men ulystardy biriktirip, azamattyq, beıbitshilik pen konfessııaaralyq kelisimdi saqtap, tatýlyq pen senimdilikti serik etýdiń arqasynda búginde memleketimiz órkendep, ilgeri qadam basyp keledi.
Táýelsizdigimizdi alǵan ýaqyttan bastap elimizde konfessııaaralyq jáne dinaralyq suhbat pen kelisimniń biregeı modeli quryldy. Atalmysh model tıimdiliginiń birden-bir kórinisi – ár úsh jyl saıyn ótetin Álemdik jáne dástúrli dinder kóshbasshylarynyń sezderi.
2003, 2006, 2009, 2012, 2015, 2018 jáne 2022 jyldary Astanada ótken Álemdik jáne dástúrli din basshylarynyń sezderi táýelsiz Qazaqstan tarıhynda ǵana emes, álemdegi asa iri halyqaralyq is-sharalardyń qatarynan tabyldy.
Bul forýmdardyń sátti ótýi elimizdiń qazirgi zamannyń asa ózekti máselelerine jaýap beretin kemeldengen memleket retinde halyqaralyq arenadaǵy bedeliniń artýyna sebepshi boldy. Álemdik jáne dástúrli din basshylarynyń sezi Qazaqstannyń dinaralyq suhbat úderisine qosqan qomaqty úlesi boldy jáne tózimdilik, ózara túsinistik pen yntymaqtastyq qaǵıdattaryn nyǵaıtýda álemdik qaýymdastyqtyń aldynda aıryqsha oryn aldy.
«Bizdiń sezd órkenıetaralyq dıalog ornatatyn jahandyq deńgeıdegi alqaly jıynǵa aınaldy. Bul forýmdy ótkizýge Qazaqstannyń bastamashylyq etýi beker emes. Sebebi qazaq jeri ǵasyrlar boıy Batys pen Shyǵystyń arasyndaǵy kópir bolyp keledi. Osynda, ıaǵnı Uly dala tórinde nebir alyp kóshpeli ımperııalar ómir súrgen. Dinı ustamdylyq – olardyń bárine ortaq sıpat», – dep prezıdentimiz Qasym-Jomart Toqaev bul sezderdiń jahandyq konstýktıvti dıalog alańy ekenin atap ótti.
Elordamyzda ótken Álemdik jáne dástúrli dinder lıderleriniń jeti Sezi de dinder men órkenıetter arasyndaǵy qaqtyǵysqa qarsy baǵyttalyp, dinniń beıbit sıpatta bolatynyn jáne ártúrli dinderdiń beıbit qatar ómir súre alatynyn aldyǵa tartty.
Erte zamannan saıyn dalamyz dinder men mádenıetterdiń toǵysynda ornalasyp, asyl dinimiz ıslamdy ustanyp, ózindik mádenıet qalyptastyrǵan qazaq halqynyń mańdaıyna Álemdik jáne dástúrli dinderdiń kóshbasshylaryn óz jerine shaqyryp,mámilege keltirýdiń tarıhı mıssııasy jazylǵan syńaıly.
Ánýar qajy IZIMBAIULY,
Mańǵystaý oblysynyń bas ımamy
