RAMAZANDAǴY ORAZANYŃ SAÝABY

Alla ne sebepti «orazanyń saýabyn men beremin» dedi?

Ábý Hýraıradan jetken qudsı hadıste:  «Adam balasynyń tek orazadan basqa amalynyń barlyǵy ózi úshin. Al oraza –  Men úshin. Onyń saýabyn Ózim beremin» degen.

Osy hadıste Alla taǵala «Al, oraza –  Men úshin. Onyń saýabyn Ózim beremin» dedi, osy sózge anyqtama bergen ǵalymdar eki túrli túsinikteme aıtady:

1) Oraza - nápsiniń úlesin tastaýǵa úıretedi. Sebebi, adam oraza arqyly ózin adal jáne aram bolǵan nárselerden tyıyp jatyr. Aramnan tyıylý – ǵıbadat sanalady. Al, adal nárseden tyıylý – eń úlken qulshylyq bolmaq. Adam namaz oqyp jatqanda 5-10 mın ózin nápsisin adal men aramnan tyıady. Namazyn aıaqtaǵan soń iship-jeýin jalǵastyrady. Al, orazanyń saýabyn ózińiz esepeteı berińiz...

Aýzy berik adam sýmen tamaqqa qoly jete tura Alla úshin bas tartady. Bul shynaıy ımannyń kórinisi. Sol sebepti ǵalymdar:«Kóz kórmegen ǵaıyptaǵy nárse úshin, nápsi qalaýyn tastaǵan adam qandaı baqytty!» degen.

2) Oraza – jasyryn qulshylyq bolyp sanalady. Ony tek Alla biledi. Sebebi sol bolsa kerek, qudsı hadıste «Al, namaz, zeket, qajylyq –  Men úshin, onyń saýabyn Ózim beremin» dep aıtpady. Bul amaldar adamnyń syrtqy tánimen, materıaldyq dúnıesimen oryndalatyn bolǵan soń, keıde kóz boıaýshylyq oryn alýy múmkin. Al, oraza olaı emes.

Termızıden jetken bir hadıste Paıǵambarymyz: «Oraza – sabyrdyń jartysy», dep aıtady. Osy tusta sabyrdyń úsh túri baryn aıta keteıik:

1) Qulshylyqta sabyrlyq;

2) Allanyń aram etken nársesine sabyrlyq;

3) Allanyń synaǵyna sabyrlyq.

Oraza – osy úsh sabyrlyqty jınaýshy amal. Rasynda aýzy berik adamnyń tańnan keshke deıin ash júrýi óz aldyna bólek qulshylyq. Oraza ustap kóziń aramǵa qaraýdan, qulaǵymen aram nárse estýden, tilimen aram sóz aıtýdan tyıyp sabyr etedi. Sý men tamaq ishýden tyıylyp, kishkentaı  synaqty bastan ótkizedi.

Keıde amaldar meken men zaman jaǵynan saýaptary eselenip otyrady. Mekennen maqsat qasıetti jerlerde namaz oqý. Máselen, Paıǵambarymyz: «Meniń bul meshitimde oqylǵan bir namaz –  Haram meshitinen basqa meshitterde oqylǵan myń namazdan artyq», - deıdi.

Zamannan maqsat qasıetti aılarda oraza ustaý, jaqsylyq qylý. Ramazan aıynyń orazasy paryz bolǵan soń, saýaptar eselenetin aı bolyp sanalady. Paıǵambarymyzdan qandaı sadaq jaqsyraq dep suralǵanda: «Ramazanda berilgen sadaqa»,-dep jaýap berdi.

Alla barshańyzdyń orazalaryńyzdy qabyl etip, saýaptan jazsyn!

Shalqar Joldy,

"Áziret Sultan" meshitiniń ustazy