QYZYN UZATQAN ÁRBIR ÁKEGE...
Qyzyńdy jyly júzben qarsy al, biraq tek onyń aıtqanymen ǵana shektelme, kúıeý balanyń da ýájin tyńda.
+ Ashýǵa erik berme. Qyzyń shyn jábir kórse, onyń kóz jasy – amanat. Biraq onyń tolyqtaı aq ekenine kóz jetkizbeı turyp, bir sáttik sezimmen jasalǵan áreket onyń otbasyn shaıqaltyp jiberýi múmkin.
+ Qandaı sheshim qabyldasań da, ony jalǵyz óziń kesip aıtpa. Qyzyńmen aqyldas, jolyn birge talqyla, onyń pikirin esker.
Ertede qazaqta ajyrasý sırek bolatyn. Onyń sebebi – qyzdyń tórkininiń parasaty men sabyry edi.
Buryn kelin kúıeýine renjip, tórkinine kelse, ákesi ony uzaq ustamaı, qaıtadan otaýyna jóneltetin de:
«Qaraǵym, barǵan jeriń – óz úıiń. Men saǵan máńgi tirek bola almaımyn» – dep batasyn berip shyǵaryp salatyn.
Al qazir erli-zaıyptynyń arasynda azyn-aýlaq kıkiljiń týa qalsa, keıbir ákeler araǵa túsip, tatýlyqty emes, tartysty kúsheıtip alady.
Qyzymdy qorǵaımyn dep júrip, keıde onyń bútin bir ǵumyryn oırandap alýy múmkin.
Keıbir ákeler munymen de toqtamaı, mán-jaıdy tolyq bilmeı jatyp, qyzdaryn sot pen polıtsııanyń tabaldyryǵyn tozdyrýǵa deıin aparady.
Al kúıeý jigit áıeliniń ózine qarsy aryz túsirgenin estise, júregi sýyp, qaıtyp kelmeı qoıýy ǵajap emes.
Sońy – shańyraqtyń shaıqalýy.
Mundaı jaǵdaıdyń ýshyǵýyna keıbir áıel quqyǵyn jeleý etken uıymdardyń da áseri tıgeni jasyryn emes.
Sondyqtan qyzyn uzatqan árbir ákege aıtar aqylym:
- Qyzyń shaǵym aıtyp kelse, aldymen sabyr saqta. Tyńda, biraq ashýǵa berilme. Kúıeý balany shaqyryp, onyń da sózin tyńda.
- Kúıeý balany bótensimeı, óz balańdaı qarsy al. Onymen bılik aıtqan tóreshideı emes, aqyl aıtqan ákedeı sóıles.
Eki jaqtyń da sózin tarazyǵa salyp, baıyppen tyńda.
- Áńgime ústinde qabaǵyńdy túıme. Jyly sóz ben jaıdary júz – tatýlyqtyń kilti.
- Eger qyzyń kinásiz bolsa, kúıeý balanyń qatesin sabyrmen eskertip, onyń eline habar salyp, jaǵdaıdyń qaıtalanbaýyn sura.
Al eger qyzyń aǵattyq jasaǵan bolsa, ony jerge qaratpa. Kúıeý balamen aqyldasyp, qyzdy óz shańyraǵyna qaıta tabysta.
- Eger qyzyń jazyqsyz bolyp, kúıeý balasy onyń ar-namysyna til tıgizip, senimge syzat túsirse, ári qyz ózi qaıtqysy kelmese – onda abyroımen, dabyrasyz ajyrasqany jón.
Túıin sóz:
Sabyr et. Ózińdi usta. Tilińdi tyı. Bir jaqty ǵana emes, eki jaqty da tyńda.
Al, anasy, saǵan aıtarym:
Qyzyńa kúıeýiniń úıin qadirleýdi, shańyraqtyń ońaılyqpen tigilmeıtinin úıret.
Bul tek erkelik emes. Keıde daýdyń jartysy seniń orynsyz aralasýyńnan, tárbıedegi olqylyqtan nemese otbasyndaǵy túsinistik pen kelisimniń qadirin úıretpegennen týyndaıdy.
