Qyzdy tárbıeleýdegi ákeniń róli

Áke tárbıesi balany materıaldyq turǵyda qamtamasyz etýmen ǵana shektelmeıdi. Qyz balanyń damýynda, tolyqqandy azamat bolyp ósýinde anasynyń bere almaıtynyn ákesi bere alady. Jaqsy tárbıe áke men ananyń birdeı atsalysýynan qalyptasady.

3 jasqa jetkende qyz er adam men áıeldiń aıyrmashylyǵyn bile bastaıdy. Osy ýaqytta qyz balada áıel zatyna tán qylyqtar men ádetter damıdy. Anasynan góri, ákesiniń janynda ózin erkin, «hanshaıymdaı» sezinedi, tek áke ǵana qyzynyń náziktigi men súıkimdiligin qalyptastyra alady. 

Ana balasynyń jynysyna mán bermeıdi deıdi psıhologtar. Al ákeler alǵashqy kúnnen-aq sábıin bala nemese qyz retinde qabyldaıdy. Sondyqtan tolyqqandy otbasylarda qyzdarǵa tán náziktik, bııazylyq pen uıańdyq erterek damıdy.

Ákeniń qyz tárbıesinde alar orny óte mańyzdy. Qyzdyń damýy, bolashaq jarymen qarym-qatynasy, otbasylyq ómirdegi jetistigi men ózin-ózi tanytýy dál osy ákeniń qyzyna degen qarym-qatynasyna baılanysty. Qyzdar bolashaq jaryn ákesine uqsaǵanyn qalaıdy.

Qyzyna jyly sóılep, únemi maqtap otyratyn áke qyzdyń ózin-ózi baǵalap, úlken jetistikterge jetýine, durys joldy tańdaýyna sebep bolady.

Al, «Qyzdy qyryq úıden tyı» dep  jónsiz dórekilik tanytyp, kemsitip, ursý qyzdyń jigerin jasytyp, adam bolyp, áıel bolyp qalyptasýyna kedergi keltiredi.

Eskertý jasaǵanda da «qyzym, onyń durys bolmaıdy», «qyz balaǵa ol qylyq jaraspaıdy» dep sypaıy túrde aıtqan jón, balıǵat jasqa tolǵanda tym erkeletip, aıtqanyn eki etpeı oryndaı berý de durys emes.

Anasy qyzyn úı sharýasyna baýlyp, erteńgi kúni bir úıdiń kelini bolatynyn, ana bolatynyn aıtyp otyrsa, ákesi ómirdiń basqa da jalpy túsinikterin qalyptastyra otyryp bolashaq ómirge daıyndaıdy.

Qyzymen birlesip oıyndar oınaý, logıkalyq esepter sheshý, sabaǵyn birlesip oqý – qyzdyń damýyndaǵy mańyzdy sátter.

Meıirimdilik tanytý, kómek suraǵan sátterinde qol ushyn berip, aqylyn aıtý – ákeniń mindeti.Qyz otbasynda ne kórse sony bolashaq uıasynda jasaıtynyn esten shyǵarmańyz.