Qıyndyqtyń syıyn kúresken alady
Erterekte bir sultan qala syrtyna óte úlken saraı saldyrady. Ashylý saltanatyna óz halqynyń barlyǵyna shaqyrý jiberedi. Qala syrtyndaǵy bul saraıǵa aparatyn tek ǵana jalǵyz aıaq bir jol bar eken. Sultan sol joldyń qaq ortasyna úlken bir tas qoıdyrypty. Al ózi halyqtyń bul kóriniske qalaı áreket etetinin kórmek úshin saraıdyń álgi jol jaqsy kórinetin bir terezesiniń aldyna otyryp, baqylap otyrady. Sol aımaqtyń eń dáýletti saýdagerleri, baılary saraıǵa qaraı aǵylyp kelip jatty. Barlyǵy qıyn da bolsa álgi tasty aınalyp ótip jatty. Olardyń kópshiligi: «bul sultan halqtan qanshama salyq jınasa da, «osy bir joldy jóndeıin» demepti. Osyndaı da sultan bola ma eken?»- dep sógip jatady.
Keshke qaraı ymyrt úıirile bastaǵanda saraıǵa kelýshilerdiń sońy bolyp bir aýyl turǵyny kele jatady. Bul adam álgi saraıǵa jemis-jıdek, kókónis arqalap kele jatyr eken. Tas tusyna kelgende arqasyndaǵy sebetti jerge qoıa sala, álgi tasty joldan tasalaýǵa kirise ketedi. Alaıda tas úlken ári aýyr edi. Biraq tastyń aýyrlyǵy bul kisini toqtatpady. Qaıta amalyn taýyp, tasty aýnatý úshin astyna tyǵyp kótermekke aǵash izdep tabady. Ary-beri tyrysyp, sońynda sol tasty aýnatyp, joldan alystatady. Ketpek bolyp, qoıǵan sebetin arqasyna qaıta salmaq úshin yńǵaılana bergende, álgindegi tastyń baıaǵy turǵan jerinde bir dorbanyń jatqanyn kózi shalyp qalady. Dorbany alyp qarasa syrtynda bir-eki aýyz sóz ben sultannyń móri bar eken. Ol jazýda sultan: «Bul altyndar osy kedergini joldan alyp tastaǵan adamdiki bolsyn», - depti. Osylaısha jolynda kezdesken kedergige basqany kinálámastan kúrese bilgen bul adam, tókken teriniń aqysyn teri keppeı turyp alǵan eken.
Bul oqıǵadan bizdiń de alar sabaǵymyz bar: ómirimizde kezdesetin árbir qıyndyqtyń sońynda kúresken adam úshin syı-sııapaty bar. Alla Elshisi (s.a.s) bir sózinde: «jumysshy jaldasańdar aqysyn teri keppeı turyp berińder»,- deıdi. Dinimiz muny qatardaǵy árbir musylmanǵa buıyrsa, dinimizdi bergen – Alla , aqymyzdy jemeıtini haq.
