Qurannan qate izdegen Garı Mıller taǵdyry qalaı boldy?
Garı Mıller – Saýd Arabııasyndaǵy Fahd patsha atyndaǵy Munaı jáne ken ýnıversıtetiniń Matematıka kafedrasynyń zertteý bóliminiń múshesi. Ol hrıstıan dinin nasıhattaý salasyndaǵy belsendi mıssıonerlerdiń biri bolatyn. Kıeli kitap boıynsha bilimi tereń maman edi. Matematıkany erekshe súıetin Garı logıkany da jaqsy kóretin. Basqasha aıtqanda, árbir iste júıeli qısyndylyqty talap etetin.
Islam dinin qabyldaý oqıǵasy
Kúnderdiń kúni ol Qurandy tolyqtaı oqyp shyǵýǵa bel býady. Maqsat – bireý. Musylmandardy hrıstıan dinine nasıhattaý barysynda, Qurannyń qatelikterin olardyń betine basý. Ol 15 ǵasyr buryn jazylǵan kóne kitap ishinen shól dala jáne sol saryndaǵy oqıǵalardy oqımyn degen oıda boldy. Biraq, Qurannan álemdegi eshbir kitapta jazylmaǵan dúnıelerdi oqyǵan kezde abdyrap qaldy.
Sonda da ol úmitin úzbeı, Muhammed paıǵambar (s.ǵ.s.) jubaıy Hadısha jáne ul-qyzdarynan aıyrylǵan kezdegi júıkesi juqaryp, kúızeliske ushyraǵany jaıly bir jazbalar oqımyn dep oılaǵan-tyn. Kerisinshe, tolyqtaı «Márııam» atty súreni kórgende qatty tań qaldy. Márııam anaǵa degen Qurandaǵy qurmet basqa kıeli kitaptardyń eshqaısysynda joq edi. Tipti, Injildiń ózinde de. Al, Aısha nemese Fatıma degen súreler atymen joq. Sonymen birge, Isa (ǵ.s.) esimi Quranda 25 ret atalyp ótken. Al, Muhammed (s.ǵ.s.) esimin qansha úńilip izdegenimen, bar-joǵy bes-aq jerden kezdestirgen Garıdyń tańdanysy ulǵaıa tústi.
Biraq, álde de bolsa, bir qate taýyp alarmyn degen oımen Qurandy oqýyn toqtatpaıdy. Sonda «Olar Quranǵa zer salyp qaramaı ma? Eger ol (Quran) Alladan basqa bireýdiń tarapynan bolǵanda, olar onda kóptegen qaıshylyqtar tabar edi»[1] degen aıatty oqyǵanda shalqasynan tústi.
Doktor G.Mıller bul aıat jóninde: «Qazirgi tańdaǵy ǵylym negizi – teorııasy durys bolý úshin onyń, qatelerin anyqtap, olardy túzetý. Al, Qurannyń musylman jáne musylman emesterge Quran ishinen qate tabýǵa shaqyrýy – ǵajaıyp qubylys. Biraq, ol qateni tabý qaıda!» – degen eken. Osyndaı oıǵa toqtaǵan ol: «Álemde eshbir kitap avtory shyǵarmasyn jazyp bolǵan soń, eńbegimde eshbir qate-kemshilik joq, qalasańdar ózderiń izdep kórińder dep aıtýǵa batyly barmas edi», – deıdi.
Doktor G.Mıllerdi erekshe tań qaldyrǵan aıattardyń biri: «Aspan men jer birtutas bolyp, biz olardy ajyratqanymyzdy jáne árbir tiri nárseni sýdan jasaǵanymyzdy kúpirlik etýshiler kórmeı me? Olar sonda da senbeı me?»[2]. Doktor: «Shyn máninde, bul aıat – 1973 jyly Nobel syılyǵy berilgen ǵylymı jańalyq – úlken jarylys teorııasynyń dál ózi. Aıatta qazirgi ǵalam úlken jarylys nátıjesinde paıda bolǵanyn baıandaýda», – deıdi.
Aıattyń sońǵy bóliginde sý tirshilik kózi ekeni aıtylady. Doktor Garı Mıller: «Bul – erekshe tań qalatyn jaıt. Ǵylym sońǵy jyldary ashqan jańalyqtyń biri, jasýsha 80 paıyz tsıtaplazmadan quralady. Tsıtaplazma – sýdyń negizgi quramy. 1400 jyl buryn jazý-syzýdy bilmeıtin kisi aspannan ıláhı ýahı kelmese, qalaısha munyń barlyǵyn bilýi múmkin», – degen eken.
Osylaısha, Mıller 1977 jyly Islam dinin qabyldaıdy. Islam dini nasıhatshylarynyń birine aınalǵan G.Mıller sebebimen kóptegen adamdar musylman bolǵan.
