QURAN SEKTORYN AShÝ – ÚLKEN IS, MAŃYZDY BASTAMA
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elimizdegi barsha din qyzmetkerlerine Baǵdarlyq baıandamasyn joldap, 2024 jylda atqarylatyn basty jumys baǵyttaryn aıqyndap berdi.
Bas múftı Baǵdarlyq baıandamasynda Qazaqstan musylmandary dinı basqarmasy janynan Quran sektory ashylatynyn, atalǵan sektor Qarılar daıarlaý ortalyqtarynyń jumysyn jandandyrýǵa, Qurandy saýatty oqıtyn ımamdar shoǵyryn qalyptastyrýǵa, Quran jarystaryn sapaly ári nátıjeli ótkizýge jan-jaqty úles qosýy tıis ekenin aıryqsha atap ótti.
Biz bul jańalyqty erekshe qýanyshpen qabyldadyq. Musylman elderiniń Dinı basqarmalarynda Quran bólimderi, Quran departamentteri jumys isteıtinin jaqsy bilemiz. Mundaı jaqsy bastama bizdiń elde de júzege assa degen tilegimiz bolatyn. Allaǵa shúkir, Bas múftı barsha din qyzmetkerlerin úlken qýanyshqa bóledi.
Ózderińizge belgili, ótken jyly Qazaqstan musylmandary dinı basqarmasynyń uıymdastyrýymen qazaq topyraǵynda tuńǵysh ret Qazaqstan Respýblıkasynyń ulttyq merekesi – Respýblıka kúnine oraı I halyqaralyq Quran jarysy joǵary deńgeıde ótken bolatyn. I halyqaralyq Quran jarysynyń ashylý rásiminde QMDB Tóraǵasy: «Bul is-sharany ótkizýdegi maqsatymyz – Quran qundylyqtaryn álemdik deńgeıde dáripteý, qasıetti kitabymyzǵa qurmet kórsetý mádenıetin qalyptastyrý, elimizdegi barsha musylman jamaǵatynyń Quran oqýǵa degen yqylasyn arttyrý» degen edi.
Rasynda, Bas múftı atap ótkendeı, bul ıgi is-shara elimizdegi qarılarǵa da úlken jiger berdi. Álemdik jarysqa elimizden eki qarıymyzdyń qatysýyn úlken jeńiske baladyq.
Naýryzbaı qajy Taǵanuly Baǵdarlyq baıandamasynda: «Biz jyl saıyn ár qalada respýblıkalyq Quran jarysyn ótkizip kelemiz. Byltyr Aqtaýda 12-shi respýblıkalyq Quran jarysy sátti ótti. Qazir elimizde QMDB-ǵa qarasty 10 qarılar daıarlaý ortalyqtary jumys isteıdi. Alla qalasa, jýyrda taǵy 2 ortalyq ashylady.
Saıyp kelgende, osyndaı ıgi isterdiń nátıjesinde qasıetti Ramazan aıynda taraýyq namazyn óteıtin sheteldik qarılarǵa degen qajettilik jyl saıyn azaıyp keledi. Bolashaqta meshitterimizdi óz qarılarymyzben tolyq qamtamasyz etýimiz kerek.
Jamaǵattyń Quran oqý saýaty da kún sanap artýda. Tipti, jamaǵat arasynda Qurandy kóp jattaǵan, tájýıd erejesine saı durys oqı alatyn azamattar qatary kóbeıýde. Demek, bizdiń ımamdarymyz Quranǵa erekshe den qoıyp, saýatty oqýymen, tereń bilimimen, kórkem minezimen árqashan jamaǵatqa úlgi bolýy qajet.
Ardaqty Paıǵambarymyz (oǵan Allanyń salaýaty men sálemi bolsyn): «Senderdiń eń jaqsylaryń – Qurandy úırenip, ony úıretkenderiń», – dep aıtqandaı, biz Qurandy úırenip qana qoımaı, ony úıretýshilerden bolýymyz kerek. Ótken jyly elimiz boıynsha 7 335 adam Quran jattaý kýrsynan ótti. Bul – jaqsy kórsetish. Alaıda biz bul mejemen shektelip qalmaýymyz qajet. Osy rette QMDB janynan Quran sektoryn ashý týraly sheshimge keldim» dep atap ótti.
Sonymen qatar QMDB Tóraǵasy ótken jylǵy tájirıbeni eskerip, barlyq óńirdegi ımamdar arasynda ótken Quran úıretý kýrsy bıyl qaıta jalǵasatynyn jetkizdi. Bul rette Dinı basqarmanyń biryńǵaı Quran tájýıdi kitapshasyn shyǵarýdyń mańyzy zor ekenin tilge tıek etip, «Quran úıretý erejesi» kitapshasyn shyǵarýdy tapsyrdy. Bul da biz úshin úlken qýanyshtyń biri boldy.
Alla Taǵala Quran Kárimde Paıǵambarymyzǵa (oǵan Allanyń salaýaty men sálemi bolsyn): «Biz saǵan ár nárseni baıandaıtyn jáne musylmandar úshin týra jol, meıirim jáne súıinshi retinde Qurandy túsirdik», – dep aıtqan («Nahl» súresi, 89 aıat). Demek, adam balasy Qurandy ómirine shamshyraq eter bolsa, Allanyń qasıetti kálámi týra joldy kórsetip, Rahmannyń meıirimine bólep, Jabbar ıemizdiń súıinshisine, ıaǵnı, jánnatqa jetkizedi.
Halqymyz qashan da Quranǵa erekshe qurmet kórsetken. Kimniń úıine barsańyz da tórinde Quran ilýli turady, al ony bireý oqysa, uıyp tyńdaıdy. «Aǵraf» súresindegi: «Qashan Quran oqylsa, Oǵan qulaq salyp tyńdańdar da úndemeńder. Árıne meıirimge bólenersińder» degen aıatqa amal etken ata-babamyzdyń joly bizge de násip bolýda.
Paıǵambarymyz Muhammed (oǵan Allanyń salaýaty men sálemi bolsyn) siz ben bizge súıinshi habar jetkizgendeı, kimde-kim Qurannyń bir árpin oqysa, oǵan odan bir jaqsylyq bar ári ol on ese arta túsedi. Osy hadıstiń olyq mátininde bylaı delingen: «Kim Alla Taǵala kitabynyń bir árpin oqysa, oǵan odan bir jaqsylyq bar ári jaqsylyq on ese arta túsedi. «Álıf-lám-mım»-di bir árip demeımin. Bálkim, «álıf» bir árip, «lám» bir árip, «mım» bir árip».
Shyn máninde, Quran oqý, jattaý, oǵan amal etý, aıattardyń maǵynasyn tereń oılaný dúnıe men onyń ishindegi barlyq nárseden qaıyrly. Quranǵa jaqyn adam Allaǵa jaqyndaı túsedi. Al Allaǵa jaqyndaı túsken pendeniń júregi tynyshtyq tabady. Júregi tynyshtyq tapqan adam eshnárseden qoryqpaıdy. Joǵaryda keltirilgen aıattardyń jalǵasynda bylaı delingen: «Aqıqatyn aıtar bolsaq, Allaǵa jaqyn jandar esh qorqýdy bilmeıdi jáne ýaıym-qaıǵydan qapa bolmaıdy» («Iýnýs» súresi, 62-aıat).
Alla Taǵala barshamyzdy óziniń aqıqat jolynda berik, saýapty isterge sebepker bolýdy násip etsin. Qurandy oqyp jattaǵan, oǵan amal etken jáne qarılarǵa qoldaý kórsetken jandarǵa Alla razy bolsyn. Qazaqstan musylmandary dinı basqarmasynyń Quran qundylyqtaryn qoǵamǵa dáripteý jolyndaǵy bastamalaryna sáttilik pen bereke tileımiz.
Estaı AITÝǴANULY,
Qaraǵandy oblysynyń bas ımamy
