Quran oqyp berip, oqýǵa qabyldandy

Bir aılyq jazǵy demalysty ótkizip bolyp,  30-qyrkúıek kúni qalaǵa kelip jettik. Qaladaǵy úıge ornalasyp bolǵanymyz sol edi, alǵashqy qońyraý 1-qyrkúıek te kelip qaldy. Úıimizdiń aldynda terezeden qarasaq, mektep formasyn kıgen balalardan mektep aýlasy gúlge oranǵan qyzyl alańǵa uqsap tur. Qyzym ekeýmiz terezeden qyzyǵyp qarap turmyz. Qyzymnyń jasy áli beste bolatyn qyrkúıek aıynyń sońynda altyǵa tolady. Mektep sharty boıynsha bala mektepke qabyldaný úshin alty jasqa tolý kerek eken.

Sodan ne kerek, qyzymyzdy birinshi synypqa jiberý máselesi artta qalǵan bolatyn. Sol kúni ýaıym  qysty, aýyldan shyǵarda anamnyń «qyzyńdy mektepke nýlevoı synypqa ber» degen sózi qulaǵymda shyńyldap tur. Balamdy mektepke bersem ba, joq áli erte me» dep áıelimmen aqyldastym. Ol da: «bala qınalyp qalmaı ma?» – dep alańdap qoıady. Degenmen, qyz balasy ǵoı, erterek mektepke bersek, ózimizge jaqsy. Kim biledi, áli on eki jyl oqıdy degen oılar da kelip qoıady. Endi, mine, eki oı arasynda turmyn. Túnde Alladan járdem tilep, eki rakaǵat namaz oqyp, eki oıdyń jaqsysyna shyǵarýdy surap duǵa ettim.

Tańerteńgisin qyzymnyń qasyna baryp:

– Qyzym, mektepke barasyń ba? – dep suradym.
– Baramyn! – dedi ol esh oılanbastan. Sonda men anasyna qarap:
– Qyzymdy kıindirip ber, biz mektepke baramyz! – dep aıttym. Qyzym qýanyp ketti. Jańadan alǵan sporttyq kıimi bolatyn sony ústine kıip alyp úıden shyqtyq. Jaz boıy ózimizdiń daıyndalǵan materıaldarymyz bar edi, olardyń barlyǵyn bir býma qylyp salyp aldym.

Endi ekeýmiz mektepke bara jatyrmyz. Jolda qyzymnan:
– Qyzym, shynymen mektepke barasyń ba? – dedim.
– Iıa, áke.
– Onda qazir mektepke barǵanda, senen ne surasa da durystap jaýap ber, – dep qyzymdy ózimshe daıyndap bara jatyrmyn.

Mektepke kirip edik, bizdi birden bastaýysh synyptarynyń meńgerýshisine jiberdi. Ol kisige kirip, otyryp mán jaıdy túsindire bastadym:
– Sálemetsiz be, ruqsat pa eken? – dep kabınetine bas suqtym.
– Iıa, kirińizder.
– Bizdiń qyzymyz mektepke barǵysy keledi.

Alaıda, qyzymnyń jasy osy aıdyń aıaǵynda ǵana altyǵa tolatynyn aıttym. Soǵan qosa jazdaǵy daıyndalǵan materıaldardy aldyna jaıyp kórsetip jatyrmyn.

– Keshirińizder, barlyǵyn túsinemin. Biraq mektepke altyǵa tolmaǵan balalardy qabyldaı almaımyz, – degen jaýaptan basqa nárse estimedik.
– Onda basshyǵa kirsek bolady ma? – dep suradym.
– Kirińizder, ol kisi de báribir sony aıtady, – dep bastaýysh meńgerýshisi shyǵaryp saldy.

Qyzymnyń jigeri janshylatyn boldy-aý degen oı mazamdy aldy. Onyń aldynda ózimdi yńǵaısyzdaý sezinip turmyn. Kishkentaı kezde mektepke bara almaı qalǵan balalarǵa ata-anasy «qoryqpa áli jetip alasyń» dep aıtýshy edi. Sondaı jaǵdaı bola ma degen oı kele berdi. Sonda da qyzym ekeýmiz mektep dırektorynyń aldyna kirdik. Qysylyp turyp:
– Biz sizderdiń mektepterińizge ata-ana bolsaq degen edik, – degen sózdermen bastadym.
– Balanyń jasy qanshada?
– Beste, biraq osy aıdyń ishinde altyǵa tolady, – dedim. Mektep basshysy qyzyma qarap turyp suraqtar qoıa bastady:
– Atyń kim?
– Jansulý.
– Jasyń neshede?
– Beste.
– Ákeńniń aty kim?
– Jandos.
– Ákeń qaıda jumys isteıdi.
– Sportta.
– Sportta ne isteıdi?
–Balalardy jattyqtyrady, kúrespen shuǵyldanady, – dep jaýap berip tur. Ár suraqqa jaýap bergen saıyn ózim suraqqa tartylyp jatqandaı sezinip otyrmyn.
– Al, qane endi maǵan bir jattaý aıtyp bershi, ornyńnan tur, turyp aıtsań jaqsy estiledi – dedi mektep basshysy. Sodan soń «Aıý otyr partada shyǵar?» dep demin ishke tartqanda, mysqyldyń syńaıy baıqaldy.

Qyzym maǵan qarap, «ne aıtamyn» degendeı mıyǵymen basyn ızedi. «Aıý otyr partada shyǵar» degenin estigen soń ony barlyq bala biledi, al biz erekshe tuspen keleık degen nıetpen.
–  Al qyzym, apaıǵa quran oqyp bershi, – dedim.
– Bısmılláhır rahmanır rahım. Qýl hýaallahý ahad …, – dep Jansulý qyzym «Yhylas» súresin oqyp berdi.
– Áı, mynaý keremet qoı, Quran súrelerin oqyp jattap júrgen qyzǵa birinshi synyp baǵdarlamasyn ıgerý qıyn emes shyǵar? – dep mektep basshysy tańdanysyn bildirip jatyr. Sodan soń bastaýysh synyp meńgerýshisine qońyraý shalyp, «qazir Sizge bir qyz balasy ákesimen barady, qyzdyń qujattaryn qabyldap, erteńnen bastap partaǵa otyrǵyzyńyz. Ata-anasynan bala oqý baǵdarlamasyna úlgerip otyratyndyǵy týraly qol hat alyńyz» dep tapsyrma berip jatty. Men de ishimnen «Allahqa shúkirshilik» aıtyp, qýanyp otyrmyn. Qyzymnyń júzinen de qýanysh sezilip tur. Ekeýmiz qýanyp bólmeden shyqtyq. Dırektordyń kabınetine eń jaqyn ornalasqan akt zaly bar eken, sonda kirip sájde jasap, Allaǵa madaq aıttym.

Osylaı ıstıhara namazynyń jaýabyn aldyq.

Qonyspaev Jandos Abýmýtalıfuly
Muslim.kz muraǵatynan, 2017 jyl