QOJA HAFIZDEN (Shákárimniń aýdarmasy)

* * *
Anyq erge joldas bol,
Nuq kemesin ol bilse.
Bir tamshydaı kórmes ol,
Topan sýy kez kelse.
Jatar jeri árkimniń
Topyraq bolsa bir ýys,
Ne qylady úılerin
Kókke jetken kóp qýys.
Shyq, otyrma bul úıde,
Razy bolma nanyna.
Bul qara ydys túbinde,
Tas qonaqtyń janyna.
Qanǵamdaǵy aıymsyń,
Mindiń Mysyr taǵyna.
Endi otyrmaq saǵan min,
Shyq zyndannan baǵyma.
Jupar shashqan tulymyń
Bir-birine órilgen.
Jete almady bilimim,
Nege nurly kóringen.
Qýanysh qyl rahatta,
Qaıǵysyz bol, ish sharap.
Qurandy oqyp, el aýlap,
Tuzaq qurma sen biraq.

* * *
Eger súıikti ol bala
Kóńilimdi alsa men úshin,
Samarqan men Buqara,
Berdim qara meń úshin.
Qalǵan qymyzdy ákel sen,
Ber, aıaqshy, kesemen.
Gúldi jemis, taldy ózen
Tabylmaıdy beıisten.
Shala asyqpyz jaǵalap,
Jar kóńili bir bólek.
Qastaýysh, ıis, meń, dalap
Nurly júzge ne kerek.
Mastyq, qymyz ám sóıles,
Dúnıe syryn sóz qylma.
Ol tuńǵıyq jan bilmes,
Syr da ashylmas myń jylda.
Júsiptegi sulý júz,
Kúndeı nuryn jaıǵyzǵan.
Zylıqany bilemiz,
Ar-uıattan taıǵyzǵan.
Minimdi aıttyń, razy, bil,
Men sondaıdy unaıym.
Tátti eringe ashy til
Jarasady árdaıym.
Nasıhatty, kel, esit,
Kári ǵalym aıtsa zar.
Esti, baqty jas jigit
Ony jannan dos tutar.
Merýert tizdiń jyr sózin,
Jaqsy oqyshy jaqyn kep.
Aspan shashsyn juldyzyn:
"Bárekeldi, batyr", - dep.

* * *
Májilisinde dosyńnyń
Qıyn aman qalmaǵyń.
Ár ne qylyp otyrsyń,
Jel ólsheıdi salmaǵyn.
Tátti minez, jyly sóz -
Onan eshkim qutylmas.
Zerek qusty, ashyq kóz
Buǵalyqpen tutylmas.
Ne sebepten, bilmedim,
Dos ıisi onyń joq.
Qara kózdi, boıy sym,
Aı júzdige senim joq.
Sulý-aqsyń nury mol
Min qoıatyn kisi joq.
Biraq betiń mini sol -
Ýaǵda, meıirim túsi joq.
Kóp mal, baǵyń, dosyń tur.
Aryń úshin bir oılan.
Ne kún kórip, neǵyp júr,
Baqytsyz, dossyz ǵaryp jan.
Tańda sholpan án salyp,
Sózime qobyz kúılese.
Kókte Ǵaısa qozǵalyp,
Ánimmen qosa bılese.

* * *
Keshegi basshy pirimiz
Meshitten ketti kabakqa.
Múrıdter, qalaı júremiz,
Túsemiz qandaı sabaqqa.
Pirdiń beti qaraıdy
Esek qora jaǵyna.

Bizdiki nege jaraıdy,
Qubylaǵa baqsaq taǵy da.
Jar shashyna baılanyp,
Rahatymdy bilse aqyl,
Dýana bolyp aınalyp,
Keter edi-aý kóp maqul.
Kóptiń ańyn tor quryp,
Túsirip edim tuzaqqa,
Shashyńdy jaıyp, mas qylyp,
Aıryldym ańnan uzaqqa.
Nurly júziń esirkep,
Ashty bizge anyq syr.
Jazylmaıdy sol sebep,
Jazýymda - basqa jyr.
Tas kóńilge berer me,
Áser atqan oǵymyz.
Uıyqtatpaǵan sóner me,
Júrektegi ystyq shoǵymyz.
Kekilińdi jel qozǵap,
Jaryq kúnim boldy tún.
Zarlaǵanda seni oılap,
Bar paıdam sol, sózim shyn.
Bizdiń ýly oq, bilińiz,
Kókti kóktep ótpesin.
Janyńa rahym qylyńyz.
Sizge tıip ketpesin.

ShÁKÁRIM