Qosh keldiń qasıetti Erejep!
Isi musylman jurtshylyǵy úshin qasıetti tórt aı bar. Bul týraly qasıetti Quran Kárimniń «Táýbe» súresiniń 36-aıatynda: «Rasynda, Allanyń qasynda kókter men jerdi jaratqaly Allanyń Kitabyndaǵy aılardyń sany on eki. Bulardan tórteýi qurmetti aılar. Mine osy berik din. Onda bul aılarda ózderińe zulymdyq etpeńder», – delingen. Sol ulyq aılardyń biri Erejep aıy búgin tabaldyryǵymyzdan attap otyr.
Erejep aıynyń barsha musylmandar úshin orny bólek. Allanyń aıy sanalatyn Erejep aıynda qaıyrymdy isterdi atqaryp, nápil jáne túngi qulshylyqtardy kóptep jasasaq, saýabynyń da molyraq bolary sózsiz. Alladan shyn keshirim surap, táýbesine kelgen pendeniń duǵa-tilekteri men qulshylyqtaryn qabyl etedi.
Erejep aıy Islam dinindegi qatar keletin qasıetti úsh aıdyń alǵashqysy bolyp tabylady. Qalǵan ekeýi Shaǵban men Ramazan dep atalady. Bul aılar Jaratýshy Ieniń pendelerine erekshe raqymdylyq tanytýymen, asa meıirbandyq kórsetýimen erekshelenedi. Sondyqtan, álem musylmandary bul aılarǵa asa qurmetpen qarap, qulshylyqtaryna den qoıady.
Muhammed Paıǵambarymyz (s.ǵ.s) qoshtasý qajylyǵynda: «Bir jylda on eki aı bar. Bulardan tórteýi haram aılar, úsheýi qatar kelgen – Zılqaǵda, Zúlhıjja jáne Muharram, tórtinshisi – Erejep», – dep jeke-jeke atap kórsetken[1].
Erejep aıynda qasıetti tún bar. Ol – Mıǵraj túni. Mıǵraj – Erejep aıynyń 26-nan 27-sine qaraǵan tún. Mıǵraj oqıǵasy hıjretten bir jarym jyl buryn Erejep aıynyń jıyrma jetinshi túninde boldy. «Mıǵraj» sózi «joǵary shyǵý», al «Isra» sóziniń maǵynasy «túngi sapar» degendi bildiredi. Alla Taǵala qasıetti Quran Kárimde Mıǵraj oqıǵasyn bylaısha baıan etedi: «Qulyn (Muhammedti ǵ.s.) bir túni ózine belgilerimizdi kórsetý úshin Haram meshitinen biz aınalasyn múbarak qylǵan Aqsa meshitine aparǵan Alla, ártúrli kemshilikten pák. Sháksiz,
Alla Elshisiniń (s.ǵ.s.) ózi Erejep, Shaǵban, Muharram, Sháýýal aılarynda aýyz bekitip, rýhanııatqa erekshe kóńil bólgen. Erejep aıynyń juldyzy týǵanda, Parasat padıshasy (s.ǵ.s.): «Ýa, Uly Jaratýshy! Erejep pen Shaǵban aılaryn berekeli ete kór! Bizdi qasıetti Ramazanǵa aman esen jetkizgeısiń!» –dep duǵa jasaǵan. Sondaı-aq, Alla Elshisi (s.ǵ.s.) Erejep pen Shaǵban aıynda udaıy aýyz bekitip, nápil ǵıbadattardy molynan atqarǵan.
Aqıqattyń aqjal tolqyny sahabalar da osy mezgilde bir erekshe qarqynmen qulshylyq jasaıtyn. Paryzben qosa nápil qulshylyqtaryn oryndap, joq-jitikke, jetimder men kembaǵaldarǵa qol ushyn sozyp kómektesetin. Sol úshin ısi musylman juraǵaty mundaı qasıetti aılardy qur jibermeı, qadir-qasıetin baǵalap, beıne qulshylyq pen izgilik jasaýda jarysqan jandardaı kúı keshkeni jón.
