Qaıta jalǵanǵan 47 taǵdyr
Elbasymyzdyń tikeleı tapsyrmasymen Sırııa jerinde ot basyp, opyq jegen 47 otandasymyzdyń Qazaqstanǵa qaıtarylǵanyn estigende, eldigimiz eske túsip, bir tebirenip qaldyq. «Ishten shyqqan shubar jylan» demekshi, jat aǵymnyń shyrmaýyna erip, jat jerden «jánnat izdegen» olardyń ot pen oqtyń arasynan aman-esen elge qaıtarylýy – elimizdiń bala bolashaǵyna jasalǵan ıgi qadamy, eldigimizdiń nyshany. Ot pen oqtyń ortasynda oırany shyǵa jazdaǵan 30 balanyń taǵdyry Otanyna oralmaǵanda ne bolaryn oılaýdyń ózi qorqynyshty.
Osy oraıda, qazaq jurtyn qıyn-qystaý kúnderden shashaý shyǵarmaı, shyǵynǵa uryndyrmaı alyp kele jatqan Elbasymyzdyń kóregendigine kóńil toıyp, júrek túkpirinen jalyndaǵan eldik namys oıanyp ketkenin de baıqamaı qalady ekensiń. «Adasqannyń aıyby joq, qaıta úıirin tapqan soń» dep ata-babamyz aıtyp ketkendeı, joldan jańylǵan qandastarymyzdyń qaıtyp kelýi – ıgiliktiń nyshany.
Degenmen, osy bir qýanyshty habardy «Qasqyrdy qansha baqsań da, ormanǵa qarap ulıdy» dep san-saqqa sóz júgirtkenderdi de qulaǵymyz shalyp qalyp jatyr. Sonda sanasyn soqyr senim tumshalap, jańylys qadam basqandardyń barlyǵyna baýyrymyz jylyp, basymyz aýyrmaýy kerek pe?! Bul netken qatygezdik?! Alla Taǵala qasıetti Quran kárimde: «Kim bir adamdy ólimnen qutqarsa, búkil adamzatty tiriltkenmen teń», – demeı me?! Jetimin jylatpaı, jesirin qańǵytpaǵan, nebir náýbet kezderde ózgeniń balasyn baýyryna basa bilgen tekti atanyń búgingi urpaǵy nege adasyp úıirin tapqan óz baýyryna basa almaýy kerek?! Sondyqtan da jat jerde jylap jatqan ana men balanyń taǵdyry árbir qazaqstandyq úshin qymbat bolýy tıis.
Tilge tıek eterlik taǵy bir qýanyshty jańalyq sońǵy eki jyl ishinde birde-bir Qazaqstan azamaty jalǵan jıhad uranyna aldanyp, shekara aspaǵan. Árıne, adasqan adamdy aıyptaý ońaı. Alaıda, sol adamdardyń sanasyn saýyqtyryp, raıynan qaıtarý – rasynda izgilikti is. Memleketimizdiń maqsatty saıasatynyń arqasynda byltyrǵy jyly radıkaldy aǵymdarǵa qatysy bar 58 azamatymyz atamekenge qaıta oralǵan eken. Aýyzben aıtýǵa ońaı bolǵanymen, bul sandardyń artynda qanshama ómir, qanshama otbasynyń taǵdyry tur deseńizshi!
Alla Taǵala elimizdi ejelden qanymyzǵa sińgen qamqorshy-qaıyrymdylyǵymyzdan, bólinip ketse de baýyrǵa basqan meıirbandyǵymyzdan aıyrmasyn!
Naýryzbaı qajy Taǵanuly
QMDB tóraǵasynyń birinshi orynbasary,
naıb múftı, Astana qalasynyń Bas ımamy
