Qara saqaldy ákeden, qara shashty shesheden saqtasyn!

Birde Bóken bı Syrymǵa bergen batasynyń arasynda «Jasyń alpysqa jetpesin» degen sózdi de aıtady. Syrym ózge sózderdiń bárin taldap kelip: «Jasyń alpysqa jetpesin» degen batańyzǵa men túsine almadym», – depti.

Sonda Bóken: «Men senen Qudaıdyń bergen jasyn qyzǵanam ba, júz alpysqa kel. Meniń jasym seksen tórtke keldi. Alpystan asqaly alty túrli bálege tap boldym. Men seni sol alty báleden aýlaq bolsyn dep edim. Ol mynalar: úlken úıge kire almadym, kishi úıge sııa almadym. Qara saqaldy ákem boldy, qara shashty sheshem boldy. Aýrý keldi, kárilik jeńdi,— mine, alty bále degen osy. Buny qalaı túsindiń?» – deıdi.

Sonda Syrym batyr: «Úlken úıge kire almadym degenińiz – adamnyń qatary ketedi, baratyn úıi taýsylady. Kishi úıge sııa almadym degenińiz – ózinen jasy kishi adamdardyń úıine jasy úlken adam shaqyrýsyz bara almaıdy. Qara saqaldy ákem degenińiz – ózińnen týǵan keı bala, eseıgen soń ákeniń tilin almaıdy, ákeni durys baǵa bilmeıdi. Bir sóz aıtsań betińdi qaıyryp tastaıdy. Qara shashty sheshem degenińiz – sol balanyń áıeli, keliniń. «Osy shalǵa ne kerek eken, bergen asty iship jata bermeı» deıtin shyǵar. Aýrý men kárilik túsinikti ǵoı, ata», – degen eken. 

Mine, osy altaýdyń ishinde eń qıyny, bizdińshe, «qara saqaldy áke» men «qara shashty sheshe» bolsa kerek. Ardaqty Paıǵambarymyzdyń (s.ǵ.s.) áıgili hadısinde bar emes pe: «Qııamettiń belgileriniń biri – adam óziniń qojaıynyn týady» demeı me? Bul – osynyń bir kebi. Ózińnen týǵan bala: «Anany úıt, mynany búıt» dep qartaıǵan ata-anasyna pármen berip otyrsa, bul dúnıeniń úlken sory, sol shyǵar-aý, sirá! Osydan Qudaı barshamyzdy saqtasyn!

Asylbek Áýezhanuly