PENDE BOIYNDAǴY EKI TÚRLI BOLMYS
Kezinde biz paqyrdy qazan sekildi ydystyń ishine ornalastyrylǵan maımylǵa júrgizilgen tájirıbe ekiudaı kúıge túsirip edi. Esterińizde bolsa, jańaǵy maımyl men balasy bar temir ydystyń astynan ot jaǵyp, qyzdyrý nátıjesi bylaı bolady: basynda balasyna qamorlyq jasap, qolyna alyp barynsha shydaǵan maımyl, eń sońynda, temir qyzýy qaty kúsheıgende: óz balasyn tabanynyń astyna qoıyp basyp alady.
Bul mysal adam balasynyń aqyrettegi jaǵdaıyn sıpattaý úshin aıtylatyn edi.
«Torǵaı: jańbyr jaýsa – balapanyn qorǵaıdy, tasburshaq jaýsa – óz basyn qorǵaıdy» degen maqal bul oıdy naqtylaı túsýshi edi…
Keıin, avtoryn bilmedim, japon sýretshisiniń qaınap jatqan qazandaǵy áke men bala beınelengen týyndysyn kórip, tuńǵıyq oıǵa ketkenimiz bar-dy. Ol sýrette: qaınap jatqan maıǵa batyp-jutylyp bara jatqan áke qos qolymen qulynyn tóbesine kóterip, esin joǵaltqanǵa deıin urpaǵyn saqtaý qamynda jantalasyp jatqan sáti beınelenedi.
Qarap otyryp boıyń shymyrlaıdy!
Adam rýhynyń qaısarlyǵy men qasıeti aldynda basyńdy ıesiń!
Endi osy sanadaǵy eki beıne men eki túsinik-tanymdy bezbenge salsaq, mynandaı túıin shyqqandaı: bolmysyn nápsisine baılaǵan, ózin nápsilik sıpatpen teńgergen (tánin aldyǵa shyǵaryp, ózin nápsisimen ıdentıfıkatsııalaǵan) pende óz amandyǵyn birinshi orynǵa qoıady eken;
al bolmysyn asyl rýhymen baılanystyrǵan, ózegin ar-ımanyna baılaǵan adam adamdyq boryshyn atqarýdy keýdesinen jany shyqqansha jalǵastyrady eken…
Iá, qaraqan basyn qutqarý úshin balasyn tabanǵa salý – maımyldyń isi!..
Alǵadaı ÁBILǴAZYULY
