OTQA KÚIMEGEN PAIǴAMBAR

Ibrahım (ǵ.s.) paıǵambar retinde jiberilgende el ishinde putqa tabynýshylyq keń etek alǵan edi. Ibrahım paıǵambar (ǵ.s.) puttardyń es-tússiz, jaı ǵana melshıgen meńireý tastar ekendigin, Jaratýshy bola almaıtyndyǵyn qansha túsindire aıtsa da, olardy kóndire qoıý asa qıyn sharýa edi. Óıtkeni olar ylǵı da qarsy daý aıtýdan jalyqpaıtyn. Sondyqtan da bolar Ibrahım (ǵ.s.) olardyń sanalaryna sáýle bitirip, shel basqan kóńilderin oıatý maqsatynda ǵıbratty bir is isteýdi uıǵardy.

Bir kúni qala halqy túgelimen mereke qarsańynda qalanyń syrtyna shyqty. Qaǵbaǵa kirgen Ibrahım (ǵ.s.) put ataýlynyń bárin qıratyp, baltany sol jerdegi eń úlken bir puttyń moınyna ilip qoıdy.

Merekeden qaıtyp kelgen halyq álgindegideı oıran-asyr jaǵdaıdy kórip jaǵalaryn ustasty.

Halyq:

– «Bizdiń Qudaılarymyzdy kim sonshama qorlaǵan? Sirá, bizge zulymdyq oılaǵan bireý bolar», – desti.

Bireýi: «Ibrahım degen bir jigit osy jaıynda keıingi kezde sóz etip, soqtyǵysyp júrgen. Múmkin sol bolar», – dedi.

– Olaı bolsa, ony dereý aldymyzǵa ákelińder. Moıyndasyn istegenin! – dedi halyq jamyrasa.

El surady:

– Áı, Ibrahım! Bizdiń qudaılarymyzǵa buny istegen sen be?

Ibrahım (ǵ.s.) oı salmaq nıetpen:

– Múmkin ol isti ıyǵyna balta asynǵan anabir eń úlken qudaılaryń jasaǵan bolar?.. Múmkin aıtar, ózinen surap kórseńdershi? – dep jaýap berdi.

Olar Ibrahımge (ǵ.s.) qarap:

– Bulardyń sóıleı almaıtyndyǵyn óziń de bilmeýshi me eń?! – dedi.

Ibrahım (ǵ.s.):

– Olaı bolsa, til qatýǵa da shamasy kelmeıtin, túk paıdasy joq mundaı meńireý puttarǵa qalaı tabynasyńdar? Allany tastap, sezimsiz tasqa tabynyp ketken sender ońbassyńdar! Kishkene aqylmen oılasańdar qaıtedi? – dep shyr-pyry shyqty.

Aqyr sońynda el Ibrahımdi (ǵ.s) jurt kózinshe tirideı otqa jaqpaq boldy. Taýdaı ǵyp otyndy úıip, Ibrahımniń (ǵ.s) qol-aıaǵyn baılaǵan kúıi otqa laqtyrdy. Ibrahım (a.s) esh nárseden taısalmastan, ishteı tas-túıin bekinip, Alla Taǵalaǵa ǵana arqa súıedi.

Sol kezde Alla Taǵala Ibrahımdi (ǵ.s) jaqpaq bolǵan laýlaǵan otqa: «Áı, ot! Salqyn bol! Jaıly bol!» – dep buıyrdy. Iaǵnı, Jaratýshy ottyń kúıdirý jáne ystyq qasıetterin toqtatyp tastaǵan edi.

Osylaısha Haqtyń kómegine arqa súıegen Ibrahım paıǵambar neshe kún janǵan ottan din aman shyqty...

Sirá, halyq arasyndaǵy batyrlyqty sýretteıtin «Otqa salsa kúımeıtin, sýǵa salsa, batpaıtyn» degen teńeý osyndaı paıǵambarlardyń aqıqatynan ańyzǵa aınalsa kerek. 

Qudaıberdi Baǵashar