ÓNEGELI OTBASY

Barlyq madaq álemderdiń Rabbysy Alla Taǵalaǵa tán. Paıǵambarymyz Muhammedke, onyń áýleti men sahabalaryna ıgilikter men sálemder bolsyn!

Halqymyzda: «Otan – otbasynan bastalady», – degen qanatty sóz bar. Otbasy – shaǵyn memleket. Januıada jaqsylyq kóbeıse, qoǵamda izgilik saltanat qurady. Qoǵam túzelse – memlekettiń mereıi tasyp, mártebesi artady. Sondyqtan da, asyl dinimiz otbasy tárbıesine óte úlken mańyzdylyq qoıǵan.

Alla Taǵala qasıetti Qurandaǵy Baqara súresiniń 187-shi aıatynda:

هُنَّ لِبَاسٌ لَكُمْ وَأَنْتُمْ لِبَاسٌ لَهُنَّ

«Olar (áıelder) sender úshin kıim, sender olar úshin kıimsińder», - dep aıtqan. Osy aıattaǵy «kıim» sóziniń aıtylýynyń mánisi:

1. Kıim – adamnyń denesine eń jaqyn nárse. Demek, erli-zaıyptylar da bir-birine óte jaqyn bolýy kerek. Biriniń sózine biri muqııat qulaq asyp, janyn túsinýge tyrysýy tıis.
2. Kıim – adamnyń tánin ystyq pen sýyqtan qorǵaıdy. Sol sekildi erli-zaıyptylar da bir-birine ómirdiń ashy-tushysynda demeý bolyp júrýi tıis. Ómirdiń qıyn kezeńderinde bir-birine qoldaý kórsetip, senim artýy lázim.
3. Kıim – adamnyń denesindegi kemshilikterdi syrt kózden jasyryp turady. Sol sekildi erli-zaıyptylar da bir-biriniń qateligin syrt kózden jasyryp, jaqsylyǵyn asyryp otyrýy qajet. Óziniń de kemshiligi kóp pende ekenin este tutyp, jubaıynyń kemshilikterine keshirimmen qaraýy kerek.
4. Ádette adam bóten adamnyń kıimine jolamaıdy. Otbasynyń altyn dińgegi – adaldyq. Otbasylyq ómir baıandy bolsyn degen jandar adaldyqty tý etip ustaýy tıis.

Sondaı-aq, ardaqty Paıǵambarymyz (oǵan Allanyń ıgiligi men sálemi bolsyn) hadıste:

أَلَا كُلُّكُمْ رَاعٍ و كُلُّكُمْ مَسْؤُولٌ عَنْ رَعِيَّتِهِ

«Jaqsylap kóńil buryńdar! Senderdiń árqaısylaryń baqtashysyńdar jáne qol astylaryńdaǵy týraly suralasyńdar», - dep aıtqan. Sondyqtan da, er azamattyń da, áıel kisiniń de otbasy ishinde jaýapty bolǵan isteri bar. Atap aıtqanda, er azamatqa mindetteletin negizgi boryshtardyń biri - otbasyna dinı tálim-tárbıe berip, shamasyna saı baspana, nápaqa jáne kıim-keshekpen qamtamasyz etý bolsa, áıel kisige kúıeýine baǵynyp, buıryǵyna boısuynyp, otaǵasy joq kezde onyń mal-múlki men óziniń abyroıyn saqtaýmen qatar bala-shaǵanyń qasynda kópshilik ýaqytyn ótkizetin sebepti, olardyń dinı ahýaldary men tálim-tárbıelerin qadaǵalap, nazarda ustaýy qajet. Mine osyndaı quqyqtar ortada saqtalǵan jaǵdaıda ǵana ózgege úlgi bola alatyn otbasy bolmaq.

«Al-Fattah» meshitiniń ustazy

ARNABAEV Dýlat