ÓLIMNEN QORYQTYŃ BA?

Bizge deıin jetken derekterke súıensek Ilııas paıǵambar (ǵ.s.) ajal perishtesi Ázireıildi (ǵ.s.) kórgende qatty qoryqqan eken. Perishte Ilııas paıǵambardan ne úshin qoryqqanyn bilmekshi bolyp:

 – Ýa, Allanyń Elshisi! Ólimnen qoryqtyń ba? – dep suraıdy. Ilııas (ǵ.s.):

 – Joq. Ólimnen qoryqqandyǵymnan emes, dúnıeden qosh aıtysatyndyqtan osy kúıge tústim, – deıdi.

 Keıin sózin:

– «Dúnıede Rabbyma qulshylyq etýge, adamdarǵa jaqsylyq jasaýdy nasıhattaýǵa, jamandyqtan tyıýǵa ter tógetinmin. Barlyq ýaqytymdy qulshylyqpen jáne ıgi istermen ótkizetinmin. Kórkem minezdi bolýǵa kúsh salatynmyn. Bul halim meniń ishki dúnıemdi jaı taptyryp, kóńilimdi qýanyshqa bólep, rýhanı turǵydan lázzat alyp, kóńilimdi shat-shadyman etetin. Eger ajalym jetse bul aıtylǵan lázzattan maqurym qalamyn. Qııamet qaıymǵa deıin qabirde jatyp qalamyn dep muńǵa batamyn», – dep jalǵastyrǵan eken.

Sondyqtan ajal kelmesten buryn, qoldaǵy múmkindikti paıdalanyp, barsha kúsh-qýatymyzdy qulshylyq etýge, bilimge, Quran Kárimdi oqyp úırenýge, onymen amal etýge, úmmettiń birligine, ultymyzǵa, memleketimizge qyzmet jasaýǵa jumsaýymyz qajet.

 Daıyndaǵan – Turar TÚGELULY