NAÝQASTARǴA ARNALǴAN ÝAQYP
Ýaqyp degenimiz – musylman adamnyń artynan jalǵasatyn saýapty amal ekeni barshamyzǵa málim. Ýaqyptyń eń alǵashqy kúnderinen bastap damyǵan túri – aýrýhana salý. Bul amal – ýaqyptyń qaıyrymdylyq túrine jatady. Kezinde Mysyr elinde oqyp júrgende, meshitterdiń ishinde dári-dármekter turǵan jáshikterdi kóretin edik.
Surap kórsek, qandaı da bir musylman adam aýyryp, jazylǵan soń, qajettiliginen artylǵan, merzimi ótpegen dárilerin saýap nıetimen basqa musylman baýyryna berý nıetimen osy jáshikke qoıady eken. Meshitke tegin em jasaýǵa kelgen dáriger naýqastardy tekserip, dárilerdi qarap, naýqastarǵa beretin. Máselen, mysyrlyq Muhammed Meshalı degen dáriger elý jyl boıy tegin nemese óte az aqyǵa adamdarǵa em jasapty.
Paıǵambarymyz (Allanyń salaýaty men sálemi oǵan bolsyn): «Adamdardyń jaqsysy (ózge) adamdar úshin kóbirek paıda tıgizgenderi», – degen. (Tabaranı)
Sondyqtan, atam qazaq: «Jaqsydan sharapat» dep aıtpaqshy, árbir adam qolynan kelgenshe qınalǵanǵa kómek jasaǵany abzal. Alla barshamyzǵa saýapty amaldy kóp jasaýǵa jazsyn!
Qýat QABDOLDA
