Myna aıatty estigende, júregi toqtap qaldy

Hazireti Omar zamanynda bir jas jigit bar edi. Bul jigit beıne bir meshittiń kógershini tárizdi bolǵan. Qulshylyqtyń paryzdaryna saq bolyp, onymen qoımaı nápil ǵıbadattar arqyly Haq Taǵalaǵa jaqyndyǵyn kórgen kisi birden biletin. Birde Halıfa Omar álgi jigitti meshitten kóre almady. Ol meshitke kelgen qaraqurym jamaǵattyń bárin tanyp, kelip- kelmegenderin baqylap otyratyn. Ol álgi jigitti ary-beri qarap taba almaǵan soń jamaǵatyna daýystap: «Pálen degen jigit bar edi ǵoı. Qaıda ózi? Bir-eki kún boldy meshitte kóre almaı júrmin» dedi. Alaıda el birden jaýap bere almaı bári birdeı únsiz qalyp, bastaryn salbyratyp, kúmiljip qaldy. Omar bulardyń myna túsiniksiz áreketterine tań qalyp qaıtadan suraǵanda ishterinen bireý turyp: «Ýa, musylmandardyń Ámirshisi! Ony ádepsiz bir jerge aparatyn jolda óli kúıinde taýyp aldyq. Seniń kóńil-kúıińdi buzbaıyq dep shuǵyl jınalyp janazasyn shyǵaryp, jerlep tastaǵanbyz» deıdi. Hazireti Omar parasattylyǵymen onyń qalaı ólgenin seze qoıady. Bul bylaı bolǵan edi: Álgi jas jigittiń úıinen meshitke baratyn jol jıeginde zınaqor áıel turatyn. Ol ylǵı da bul jigittiń jolyn torýyldap, aldynan shyǵyp ózine tartatyn. Álgi jigit boıdaq edi. Áıel ony joldan taıdyrý úshin shaıtannyń barlyq aılasyn qoldanyp baqty. Biraq ár ýaqytta jas jigit áıeldiń usynystaryna qarsy turyp, betin qaıtaryp, kúnáǵa batýdan aýlaq júretin. Alaıda árbir adamnyń qansha degenmen bir osal tusy bolady. Mine, sol kúni jas jigit álsizdik tanytty. Áıel taǵy da aldynan kóbelekteı kólbeńdep shyǵyp, ózine tartqanda jigit tóze almaı álgi áıeldiń sońynan erip úıine qaraı júredi. Esiginiń aldyna kelip, kire bergen kezde jigittiń birden erinderi eriksiz qımyldap bir aıatty oqı bastaıdy. Iaǵnı jigit eriksiz túrde osy aıatty qaıtalap turǵan ornynda qımylsyz qalady. Ol basynda ózine ne bolǵanyn bilmeı, artynsha esin jınaǵan kezde bir aıatty qaıtalap turǵanyn sezedi. Sezgeni sol-aq júregi birden toqtap, jerge sylyq etip qulaıdy. Oǵan kókten jańa túskendeı qatty áser etken aıat mynaý edi:

«Haq Taǵaladan qoryqqandar árqashan  taqýalyq qorǵanynda ǵumyr keshedi. Olardy shaıtan azǵyra qalsa, dereý Allany eske alyp, esterin jııady»[1]. Beıne bir jigit osy aıatty kókten jańa túskendeı sezinedi. Ol óziniń qandaı iske qadam basqanyn ańǵaryp, Qudaı Taǵaladan qatty uıalady. Rabbysynyń oǵan degen osynshama jaqsylyǵyn umytyp, bir sát bolsyn kúnáǵa peıil kórsetkeni úshin tula boıyn qatty úreı bıleıdi. Ásirese osyndaı sátte Rabbysynyń ony óz nápsisiniń qurbany etpeı, tiline álgi aıatty salyp, Ózine qaratqany oǵan qatty áser etip, shydaı almaı ólip ketedi.

Hazireti Omar dereý adamdarmen birge álgi jigittiń qabiriniń basyna barady. Ol sol jerde turyp onyń bul taqýalyǵyn ózgelerge ǵıbrat etip Qurandaǵy: «Rabbysynan qoryqqandarǵa eki Jánnat bar»[2], - dep daýystaıdy[3].

[1] «Aǵraf» súresi, 201-aıat

[2] «Rahman» súresi, 56-aıat

[3] Mýqtasar tarıhý Dımashq lıbnı Asakır, lıbnı Manzýr 19/190-191.