Munafyq adamnyń 3 belgisi

Paıǵambarymyzdyń (s.ǵ.s.) zamanynda tilmen ıman keltirgenimen, júreginde shynaıy ıman keltirmegen bir top ekijúzdi adamdar bolǵan. Paıǵambarymyz olardyń birqatarynyń túrin tústep, esimine deıin bilgen. Munafyqtarǵa (ekijúzdi) qatysty bul qupııany Hýzaıfátýl Iamanı (r.a) esimdi sahabadan ózge eshkim bilmegen.

Birde múmınderdiń ámirshisi, halıfa Hattabtyń uly Omar (r.a.) Hýzaıfátýl Iamanıden (r.a.)sol ekijúzdilerdiń esimderin ataýyn ótinedi. Sonda sertine berik sahaba: «Men Alla Elshisiniń maǵan senip aıtqan qupııasyn jan balasyna jaq ashyp aıtpaımyn, tipti Hattabtyń uly Omarǵa da» - dep jaýap bergen. Sonda ekijúzdilerdiń qataryna enip ketpedim be eken degen oı mazalap, boıyn úreı bılegen patsha: «Ýa, Hýzaıfa! Munafyqtardyń esimderin ataýdan bas tartsań da, tym bolmasa sol munafyqtardyń ishinde Hattabtyń uly Omar degen esimniń bar-joǵyn aıta alasyń ba?» - dep ótinish bildirgen eken.

Esimderi qupııa bolyp saqtalyp qalǵan munafyqtardyń bul toby endigi ómirde joq. Adamnyń júregindegisi Allaǵa ǵana aıan bolǵandyqtan, qazirgi kezde kimniń munafyqtyq tanytyp júrgendigin Jappar Iemiz ǵana biledi. Biz ómir súrip jatqan qoǵamda da amalymyzda ne sózimizde ekijúzdiliktiń erip júrgeni haq. Alaıda, Paıǵambarymyz (s.ǵ.s.) úmmetin bul nárseden qatty qaıtarǵan.

Sózimiz ben isimiz úılespeı, aıtqan nársemizge amal etpegendigimiz – ekijúzdiliktiń naq ózi bolmaq. Rasynda, bul óte jaǵymsyz, jıirkenishti dúnıe.

Buharı men Múslımniń Ábý Hýraıradan (r.a.) rıýaıat etken hadısinde Paıǵambarymyz (s.ǵ.s.) munafyq adamnyń boıynda úsh belgisi bolatyndyǵyn aıtady: sóılese – jalǵan sóıleıdi, ýáde berse – oryndamaıdy jáne de amanatqa qııanat jasaıdy (oǵan bir nárse senip tapsyrylsa, senimdi aqtamaıdy).

 

Aýdarǵan: nurgasyr.kz