Meniń eń shynaıy dosym
Ótken kúni áleýmettik jelide kóp otyratyn dosymnan: «Qansha dosyń bar?» – dep suradym. Ol maǵan: «Óte kóp», – dep jaýap berip, úlken sandardy aıtty. Sodan keıin maǵan tańyrqaı qarap: «Sende de kóp pe?» – dep surady. «Joq, – dep jaýap berdim men. – Mende sizdegideı kóp dostarym joq. Bar joǵy segiz ǵana», – dedim.
Ol suraǵyma alańdamastan buryn sanaı bastadym:
Meniń alǵashqy ári Uly dosym – Alla. Ol, tipti, men uıyqtaǵanda da meni baqylap turady. Odan eshnárse jasyryn bolýy múmkin emes. Ol jazbastan buryn basqa dostarymnyń eshqaısysy qalamyn qozǵalta almaıdy. Meniń jaqsy isterimde júrek soǵysymdy keńeıtip, men durys jasamaǵan kezde, kókiregimdi taryltyp, bildirip otyrady, kóbinese sol arqyly durys nemese qısyq jolda ekenimdi túsinemin.
Kelesi eki dosym – Kıraman men Katıbın. Jaqsy-jamandyq, qaıyrym nemese zııandyq jasasańyz jasańyz. Ǵalym umytady, qalam umytpaıdy dep jazýdy jalǵastyra beredi.
Meniń tórtinshi «dosym» – shaıtan. Ol – dostarymnyń ishindegi eń qaýiptisi. Eshbir isi qaıyrly bolmaıdy. Aldap azǵyryp, jamandy ádemi, ýly nárseni ómir sýy etip kórsetedi. Tuzaqtary órmekshi toryna uqsas álsiz bolsa da, adamdardy aldap qoıýǵa keremet múmkindigi bar.
Meniń besinshi «dosym» – nápsim.Beli búgilgen, kúnásiz keıiptegi qaıyrshyǵa uqsaıdy. Ash kóz, toıymdy bilmeıdi. Onyń kózderi árqashan toqtamaı, júgirip birnárseni izdep turady. Ol bárin «óz quqym, meniki» dep aıtady. Onyń myljyń sózinen qutylý múmkin emes. Ony tek ǵana ashtyq arqyly tárbıeleı alamyn. Tizginine ıe bola almasam, jartastan qulatyp: «Áı, mynaǵan obal boldy ǵoı!» dep te aıtpaıdy. Shaıtannan keıingi eń jaman «dosym» osy.
Kezektegi meniń altynshy dosym – yryzdyǵym. Men áli kúnge deıin onyń opasyzdyǵyn kórmedim, biraq neden ekenin bilmeımin, men ony árdaıym qurmetsiz jáne kishkentaı etip kóremin. Ózgelerdiń yryzdyǵy maǵan tátti jáne kóp bolyp kórinedi. Men árdaıym onyń artynan erip júremin, biraq ol ony qabyldamaıdy, joq, men seniń artyńnan ereıin dep qasarysady.Kim biledi, múmkin onyki durys shyǵar.
Bul ázil emes, meniń jetinshi dosym –qıynshylyqtarym. Men týǵannan beri olar meni jalǵyz qaldyrmady. Keıde olar jelge uqsaıdy, sıpap ǵana ótedi, al kóbinese arsyz jolaýshy sııaqty otyrǵan jerinen turýdy bilmeıdi. Olardyń shydamdary zor, adamǵa tynyshtyq bermeıdi. Bireýi ornynan jańa turyp jatsa, basqasy esikti qaǵyp jatady.
Tek qana durys túsine alsam, maǵan kelgen barlyq qıyndyqtar árdaıym artynan jaqsy nárseler qaldyrady eken. Biraq kóbinese olar ketkennen keıin ǵana túsinemin, «áttegen-aı» dep qala beremin, biraq ol ketip qalǵan bolady. Bul – meniń shydamsyzdyǵymnyń kesiri.
Segizinshi jáne eń sońǵy dosym – bul ólim. Kez kelgen ýaqytta menimen birge júretin sózsiz syltaýy bar. Jol-kólik oqıǵalary, júrektiń spazmy, tynys jetispeýshiligi, tabıǵı apattar, soǵys jáne terrorlyq aktiler, qarttar men aýrýlar onyń jıi qoldanylatyn syltaýlary bolyp tabylady. Eger men ony umytyp ketsem, ol meni umytpaıdy, jelkemde turady.
Bular meniń barlyq dostarym. Shyndyǵynda, taǵy bireý bar. Meni zıratta qaldyrǵannan keıin, ózimmen birge qalatyn jaqsy amaldarym. «Bul meniń eń shynaıy dosym!» dep aıtsam, maǵan renjimeıtin shyǵarsyz. Al, sizdiń eń shynaıy dosyńyz kim?
Qýat Qabdolda
