MAHMUTShYLAR

Túrik jamaǵattarynyń arasynda qoldaýshylary kóp bolmasa da, belsendi jamaǵattardyń biri, Ystambýl qalasynda shoǵyrlanǵan – «mahmutshy» («Ismaıl aǵa») jamaǵaty. Jamaǵattyń ataýy hanafı mázhabyn ustanýshy, Naqshbandı-mýjaddıdı tarıqatyndaǵy «Halıdııa» tarmaǵynyń jetekshisi sheıh Mahmut Ýsta Osmanuly ál-Ýfıden (1929-2022) alynǵan.

1945 jyly Mahmut Efendı sharıǵat ilimderi boıynsha ıjızaǵa (kýálikke) ıe bolyp, týǵan aýylyndaǵy meshitke ımam bolady ári ustazdyq qyzmetin atqarady. 1952 jyly tórt mázhabtyń múftıi sheıh Alı Haıdar Ahıshaýıdiń mýrıdy atanady. 1954-1996 jyldar aralyǵynda Ystambýl qalasyndaǵy «Ismaıl aǵa» meshitiniń ımamy bolyp qyzmet etedi. Mahmut Efendıdiń «Tafsır Rýhýl Furqan», «Úgit-nasıhattar», «Irshadýl mýrshıdın», «Rısalá Qudsııa sharhy» sekildi birneshe kitaptary bar.

Búginde olar ishinara birneshe toptarǵa bóliný ústinde. Jamaǵattyń keıingi býyn shákirtterinde dinı fanatızm belgileri aıqyn baıqalady.

«Ismaıl aǵa» jamaǵaty uzyn saqal qoıýdy, jeńi keń shapan (jýbba), keń shalbar jáne sálde kıgendi mindetti dep sanaıdy. Áıelder jamaǵaty ústine «charshaf» atty keń, qara tústi kóılek kıip, kóp jaǵdaıda betterin búrkep alady.

Olar dinı bilimdi tek ózderiniń baspasynan shyqqan kitaptarmen oqıdy. Oqý protsesi eski osmandyq júıede jabyq pansıondarda júrgiziledi. Búginde qazaqstandyq mahmutshy jamaǵaty óz balalaryn jáne izbasarlaryn barynsha Túrkııadaǵy sondaı pansıondarda oqytýǵa tyrysady. Balalaryn elimizdiń resmı dinı oqý oryndaryna bermegendi jón kóredi.

Sonymen qatar, dinı qaǵıdattar men óz erejelerin barynsha qatań ustanýǵa, óz kósemderiniń pátýalary men nasıhattaryn buljytpaı oryndaýǵa umtylady. Jamaǵat ókilderi álemniń qaı jerinde bolsa da, bir-birimen baılanys ornatyp, júıeli jumys jasaıdy.

QMDB Dinı ońaltý bólimi