Kúıeýim «ekinshisin alsam» deıdi
Aırandaı uıyǵan otbasym, aýzynda Allasy, júrginde ımany bar arystaı azamatym men bolashaǵynan úmit kúttirgen úsh ulym – áıel baqytyn, ana baqytyn sezinip, Allanyń meıirine bólenip, alańsyz kún keshýime sebepker boldy. Kúıeýim shaǵyn dúken men kólik jýatyn ortalyq ashyp, sonymen aınalysady. Men tapqan tabysynyń berekesin kirgizip, úıde balalarymyzdy baǵyp otyramyn. Áne-mine dep tórtinshimizdi kútip júrgenbiz. Bir kúni kúıeýim kelip:
– Aqyldasatyn áńgime bolyp tur... Jaqynda bir kelinshektiń kúıeýi jol apatynan qaıtys boldy. Kelinshek buǵanasy bekimegen 4 balasymen jesir qaldy, jumysy da joq. Oǵan arqa súıer erkek kerek, ekinshi áıeldikke alyp, qarasyp turaıyn. Saýaby mol is qoı... - dep bastap kele jatyr edi, qyzǵanyshym betime shyǵyp, joldasymdy ary qaraı sóıletpedim. Meniń aıaǵym aýyr ekenin eskergen ol da áńgimesin toqtatty. Tek, oılanýymdy ótindi. Qalaı oılansam da, erimdi basqa áıelmen bólisý degen sheshimge kelise almadym. Kúıeýimniń ózge áıeldi qushyp, súıýi, maǵan aıtqan sózderin oǵan aıtýy... Bul týraly oılaýdyń ózi aýyr. Sońynda:
– Men ekinshi áıel alýyńa qarsymyn, eger ol áıeldi alatyn bolsań, men ketemin! Bala týyp bere almasam jarar edi, ekinshi áıeldi qandaı syltaýmen almaqshysyń? – dep ishimdegini aqtaryp tastadym. Kúıeýim ol áıeldi maǵan qanaǵattanbaǵannan emes, saýap úshin alamyn dep qansha aıtsa da, túk shyqpasyn túsindi de, meniń ishimdegi balany oılap, ol áıelge úılenbedi. Kúnder jyljyp óte berdi, ómirge súp-súıkimdi qyzymyz keldi. Sábıimiz bir jastan asqanda ákesiniń densaýlyǵy syr berip, mazasyzdana bastady.
Menıngıt aýrýyna shaldyqqan joldasym, kóp uzamaı ómirden ozdy. Ol ketken soń aınalam tumandanyp, ómirdiń kóleńkeli tustary qylań bere bastady. Ózi ketken soń, kásipteri de quldyrap, bankrotqa ushyrady. Men jumysqa shyǵaıyn desem, qushaǵymda emizýli balam bar. Aǵamnyń úıine kóship barýyma týra keldi. Aǵamnyń bes balasyna meniń tórt balam qosyldy, úıdegi jeńgeme bul ý-shý unamaǵany baıqalyp júrdi. Sodan, páter jaldap bólek shyqtym. Alaıda, páteraqysyn tóleýge, tamaqqa aqsha tabýǵa men dármensiz edim, bólek turǵanym bolmasa, báribir aǵamnyń moınyna masyl bolýǵa týra keldi. Kúnder óte berdi. Aǵama da ońaı soǵyp júrmegeni júdeý júzinen kórinetin. Kelinshegin de renjitkisi kelmeıdi, baýyryn da qıyndyqta qaldyryp kete almaıdy...
Bir kúni aǵam meni otyzdan asqan bir kisimen tanystyrdy. Qatty qýandym, tanysqan azamatty jigittiń tóresine baladym. Baısaldy, ımandy azamat sóziniń sońynda:
– Úıde úsh balamnyń anasy, aıaýly jarym bar, onyń aldynan ótkenim abzal. Men sizge bir jaýabyn aǵańyz arqyly aıtamyn, - dedi. Tóbemnen bireý muzdaı sý quıyp jibergendeı meń-zeń kúıge tústim. Meniń taǵdyrymnyń qaı arnaǵa aýysýy áýeli Allanyń, sodan soń beıtanys kelinshektiń sheshimine baılanysty bolyp turdy. Kezinde joldasym ruqsat suraǵanda bir beıbaq dál men sekildi qınalǵan eken ǵoı...
Sol kezde istegen isime qatty ókinip, uıalyp, Alla Taǵaladan keshirim suradym. Túnimen ıstıhara namazyn oqyp, kelinshektiń kýıeýine ruqsat berýin tiledim. Tańerteń álgi azamat kelinshegimen birge kelipti. Úıge kirgen soń, kelinshegin qaldyryp, kúıeýi syrtqa shyǵyp ketti. Al men ne aıtar eken dep qobaljyp turǵanymda, jap-jas ári óte ádemi kelinshek maǵan jaqyn kelip, qolymnan qysyp:
– Ápke! Bizdiń maqsatymyz bir! Biz qyzǵanyshqa boı aldyrmaı, Jánnátqa degen úmitpen, osy azamatty syılaı, qadirleı bileıik! Alla qalasa, birigip, er azamatymyzdyń razylyǵyn izdeıik, jaǵdaıyn jasap, jan tynyshtyǵyn alýyn oılaıyq, ımanynyń jartysy bolaıyq. Bir erkekti jalǵyz qushaqtap jatqanym úshin de suralamyn ǵoı, odan da saýap jınaǵanym abzal, - dedi.
Ekeýmiz qosylyp biraz jyladyq. Ne degen keń júrek, netken ıman! Meıirimi sheksiz Alla Taǵala meni kezindegi kemshiligim úshin kúıeýimdi alyp jazalap edi, endi táýbemdi qabyl etip, osyndaı otbasy syılady.
Bul oqıǵany men sekildi bilmestikpen asyǵys sheshim shyǵaryp júrgen sińlilerime sabaq bolsyn dep sizderge joldap otyrmyn.
P.S. Maqalada aıtylǵandar redaktsııanyń kózqarasyn bildirmeıdi!
