Kóbeıip ketken qurmalar...

Sahaba Báshır ıbn Saadtyń qyzy ári Nuǵman ıbn Báshırdiń qaryndasy áńgimeleýde:

Anam Amra bıntý Ráýaha (r.a.) meni shaqyryp, etegime eki ýys qurma salyp berdi de:

– Qyzym, bul ákeń men naǵashy aǵań Abdýllah ıbn Ráýahanyń tamaǵy, aparyp bere ǵoı, – dedi.

Jolda ketip bara jatyp, Paıǵambarymyzdy (s.ǵ.s.) kezdestirdim. Odan ákem men naǵashy aǵamnyń qaıda ekendikterin suradym. Ol maǵan:

– Qyzym, beri kele ǵoı, qolyńdaǵy ne nárse? – dep surady.

– Ýa, Rasýlalla! Bul qurma ǵoı. Ákem Báshır ıbn Saad pen naǵashy aǵam Abdýllah ıbn Raýahaǵa sheshem berip jiberdi, – dedim.

Paıǵambarymyz (s.ǵ.s.) :

– Onda beri ákele ǵoı, – dedi.

Men etegimdegi qurmalardy Alla Elshisiniń (s.ǵ.s.) ýysyna tóktim. Qurmalarym qos ýysyna da tolmaı qaldy. Paıǵambarymyz (s.ǵ.s.) bir oramal aldyryp, qurmalardy sol oramaldyń ústine shashyrata tókti. Sóıtti de janyndaǵylarǵa aıtyp, qalany aınaldyra or qazyp jatqan musylman sarbazdardyń bárin tegis qurma jeýge shaqyrtty. «Handaq» shaıqasynyń qarsańy bolatyn.

Paıǵambar shaqyrýymen Hándaq sarbazdary taıly-tuıaǵymen tegis jıylyp kelip qurmaǵa qol sozdy. Alaıda, bir tańǵalarlyǵy, kelgen áskerlerdiń barlyǵy qansha jese de oramalda úıilip turǵan qurmalardy taýysa almady. Tipti, taýyspaq túgili qurmalar óz-ózinen kóbeıip, oramalǵa syımaı ketken edi.

Iá, bul súıikti Paıǵambarymyzǵa (s.ǵ.s.)  tıesili kóp muǵjızalardyń biri ǵana.  

Qudaıberdi Baǵashar