KESIR-KESAPATQA SABYR ETÝ

27 aqpan 2024 571 0
Оqý rejımi

Ólim-jitim, kesel, jara-jaraqat, synyq, ashtyq, qýańshylyq, joqshylyq tárizdi basqa tússe, adamǵa ońaı tımeıtin oqıǵalar men báleketter az emes. Musylman balasynyń tabysy Alla Taǵalanyń izgiligi, jaqsylyǵy bolǵany sekildi, basqa túsken búkil bále, kesapat ta Alla Taǵalanyń taǵdyry.

Taǵdyrǵa sený qıynshylyq aldynda júrekke kúsh-qaırat beredi. Qıynda da, qyzyqta da adamǵa sabyr saqtaıtyn qajyr beredi. Pendelikke saı áser alǵanmen, saspaıdy, qaıǵynyń aýyr salmaǵyna da, qýanyshtyń maqtany men jeligine de berilmeıdi. Báriniń Alla Taǵaladan ekenin jáne túrli astyrtyn hıkmetteri bar ekenin biledi. Eki jaǵdaıda da kóńilin  Allanyń keshirimi men rızashylyǵyna baǵyttap kishik ári razy nıetpen mindetin atqarady.

Alla Taǵala Hadıd súresiniń 22 jáne 23-shi aıattarynda bylaı deıdi –maǵynasy-: “Jer betinde oryn alatyn (qýańshylyq, zilzala, topan sý syndy) qandaı apat bolmasyn, ıakı bastaryńa keletin (aýyrý-syrqaý, asharshylyq, jaqyndaryńnan nemese dúnıe-múlikterińnen aıyrylý syndy) qandaı aýyrtpalyq bolmasyn, bári de Biz olardy jaratpaı turyp-aq kitapqa (laýhýl-mahfýzǵa, taǵdyr taqtasyna) jazylyp qoıylǵan. Shúbásiz, bul Alla úshin op-ońaı. Bul ýystaryńnan shyǵyp ketkenge ah uryp ókinbeýleriń jáne Allanyń násip etken nyǵmetterine masaırap, asyp-taspaýlaryń úshin. Alla keýdesine nan pisip, menmensigen maqtanshaqtardyń eshbirin unatpaıdy”.

Paıǵambarymyz (s.a.ý.) bylaı degen: “Musylmannyń basyna dert, aýrý, qaıǵy, muń, qıynshylyq nemese ýaıym sekildi nárseler kelse, tipten áldeqandaı bir tiken kirse, sóz joq, sonyń qarymy retinde onyń keı kemshilikterin Alla Taǵala keshirip, búrkeıdi”. Bul hadıs musylmandar úshin úlken qýanyshty habar. Shynynda da musylman balasy denesine, baılyǵyna nemese qyzmetine kesiri tıgen jaılardyń qandaı da bir qarymy bolatyn bilip, Allanyń taǵdyryna razy bolyp, sabyr men baıyptan aınymaý kerek.

(Dúnıe nyǵmetteri úshin qatty qýanba da, keıime de. Áı, kóńil, bilgeısiń, dúnıe bir qalpynda turmaıdy).

Pіkіrler Kіrý