It úshin oqylǵan namaz

Meshit ishi. Sońǵy namazdy oqyp bolǵan soń, bári úılerine tarasty. Meshitte eshkim qalmady. Dál osy sátti kútip otyrǵan bir kisi, qulshylyq etýge kirisip ketti. Eshkim joqta ózim bir qulshylyq jasaıynshy degen bolýy kerek. Kenet syrtqy esik ashyldy.

Namazda turǵan kisi: «Syrttan bireý kirdi. Men qazir jaqsylap qulshylyq qylaıyn. Kórsin, meniń qalaı namaz oqıtynymdy» dedi ishteı. Ár qımylyn baıyppen jasap, namazyn uzaq oqydy. Bir kezde ádemilep eki jaqqa sálem berip, namazyn aıaqtady. Sóıtti de: «Bul kim boldy eken?» - dep artyna qarasa, kire beriste jaýynnan bas saýǵalap kirgen ıt tur eken. Óziniń sonshalyqty berilip jasaǵan qulshylyǵy ıt úshin bolǵanyn sezgen álgi kisi qatty ókinipti. Ittiń ornynda adam bolsa da, ol qulshylyq Alla úshin bolmaǵannan keıin ne paıda? Sóıtip, ol Alladan keshirim surap, táýbe etipti.

«Olar namazdarynda ǵapyl. Sondaı­-aq qulshylyqtaryn el­jurtqa kóz qylyp, kórsetý nıetimen oryndaıdy» («Maǵýn» súresi, 5-6 – aıattar).