Istıǵfar qıyndyqtan qutqarady
Búginde álem jurtshylyǵyn dúrliktirgen COVID-19 juqpaly derti kóptegen elge tarap úlgerdi. Álemde bul indetti juqtyrǵan adam sany 1 mıllıonnan asty, 60 myń adam dúnıe saldy. Bul jaǵdaı bizdi de alańdatyp otyr.
Barshamyzǵa belgili, Qazaqstan musylmandary dinı basqarmasynyń Ǵulamalar keńesi elimizdegi tótenshe jaǵdaıǵa baılanysty sharıǵattaǵy zárýlik úkimin negizge alyp, jamaǵat arasynda juqpaly indettiń tarap ketpeýiniń aldyn alyp, meshitte juma jáne jamaǵatpen oqylatyn namazdardy ýaqytsha toqtatý týraly pátýa shyǵardy.
Elimizdegi musylman qaýymy bul pátýa men QMDB-nyń qosymsha nusqaýlaryn túsinistikpen qabyldap, boıusynýda. QMDB Tóraǵasy, Bas múftı Naýryzbaı qajy Taǵanuly halyqty sabyrǵa shaqyryp, syndarly sátte duǵa jasap, izgi amaldar sanyn arttyrýǵa úndedi. Ózi de bastamashyl nıet tanytyp, búkil din qyzmetkerlerin múmkindiginshe qasıetti Qurandy hatym etýge shaqyrdy. Bas múftı respýblıkalyq «Áziret Sultan» meshitinde Quran hatym etý rásimine qatysyp, bata jasap, duǵa etti. Alla qabyl etsin dep tileımiz.
Naýryzbaı qajy Taǵanuly bastaǵan din qyzmetkerleri respýblıkalyq «Júrek jylýy» qaıyrymdylyq aktsııasy aıasynda muqtaj otbasylarǵa kómektesip, alǵysyn alýda. Moraldyq hám materıaldyq turǵyda jasalǵan bul kómek kóptegen otbasyǵa qýanysh syılap, jigerin oıatyp, kóńiline demeý bolǵanyn aıta ketkenimiz abzal.
Janǵa demeý bolǵan bastamanyń biri – Bas múftıdiń kezekti úndeýi. Qazaqstan musylmandary dinı basqarmasynyń tóraǵasy Naýryzbaı qajy Taǵanuly elimizdegi tótenshe jaǵdaıǵa baılanysty barsha musylman qaýymyn Allaǵa duǵa etip, eń keminde 100 ıstıǵfar jáne Ardaqty Paıǵambarymyzǵa (oǵan Allanyń salaýaty men sálemi bolsyn) salaýat aıtýǵa shaqyryp, arnaıy Úndeý joldady.
«Barsha jamaǵatty osy úndeýdi qoldap, elimizdiń amandyǵyn surap, juqpaly dertten tezirek aıyǵý úshin 3 sáýir juma kúni, besin namazynan keıin «100 ıstıǵfar jáne 100 salaýat» nemese odan da kóbirek aıtyp, duǵa jasaýǵa shaqyramyz. Jaratqan Alla halqymyzǵa amandyq bersin, naýqas jandardyń tezirek aıyǵyp ketýin jáne meshitterimizge qaıta qaýyshýdy násip etsin. Ámın!» delingen Bas múftı Naýryzbaı qajy Taǵanulynyń el musylmandaryna joldaǵan Úndeýinde.
Qasıetti juma kúni ádebıet, tarıh, óner, din, jýrnalıstıka, t.b. saladaǵy belgili tulǵalar men elimizdegi jalpy jamaǵat Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń Úndeýin qoldap, ún qosty.
Bas múftı bastamasyn qoldaǵan tulǵalar áleýmettik jelide halyqty ıgi iske ún qosýǵa shaqyryp, izgi tilegin joldady. Qoǵamdy ıstıǵfar men salaýat aıtýǵa shaqyrǵan aqyndar men jýrnalıster ósıetti óleń jyrlaryn jarııalady.
Bas múftı «24 Habar» telearnasyna bergen suhbatynda syndarly sátti saýapqa aınaldyrý qajettigin atap ótti. «Karantın kezinde sabyr saqtap, bul ýaqytty jaqsylyqpen ótkizýge tyrysqanymyz abzal. Buryn kúıbeń tirlikpen qoly tımeı júrgen kóptegen ata-ana qazir ul-qyzdarynyń qasynda. Birge qulshylyq jasap jatqandar da bar. Birge kitap oqyp, ýaqytty tıimdi paıdalanýda. Al nasıhat tyńdaımyn degen jandar úshin de múmkindik mol. Biz qazir onlaın rejımde ýaǵyz aıtyp, táýlik boıy jumys isteıtin call-center arqyly jamaǵattyń saýalyna jaýap berýdemiz», – dedi Naýryzbaı qajy Taǵanuly óz suhbatynda.
Rasynda, biz ıstıǵfar men duǵany kóbeıtsek, Alla Taǵala túrli apattar men synaqtardy, juqpaly indetterdi ortamyzdan alys etedi. Birde bir kisi Álıden (oǵan Alla razy bolsyn) qurǵaqshylyq pen asharshylyqqa, aýrý men túrli synaqqa tap bolǵanyn aıtyp, keńes suraıdy. Sonda sańlaq sahaba ıstıǵfardy kóp aıtý qajettigin jetkizgen.
Bir kisi birazdan beri perzentti bola almaı júrgenin aıtady. Sol kezde de Álı (oǵan Alla razy bolsyn) ıstıǵfardy kóbeıtýdi jetkizedi. Osy jaǵdaılardy kórip turǵan bir kisi sahabadan: «Siz túrli suraqpen kelgen barlyq adamǵa ıstıǵfar aıtý qajettigin jetkizdińiz. Munyń syry ne?» – dep suraıdy. Sonda Álı (oǵan Alla razy bolsyn) «Nuh» súresindegi: «Rabbylaryńnan keshirim tileńder. Ol óte keshirimdi. Ol senderge aspannan mol jańbyr jaýdyrady. Ári dáýletterińdi arttyryp, urpaqtaryńdy kóbeıtedi. Sender úshin baqshalar jasap, ózender aǵyzady», – degen aıattardy alǵa tartady. Rasynda, musylmannyń eń myqty qarýy – duǵa.
Islam dini keıbir ǵıbadattardy qaýipti jaǵdaılarda ýaqytsha toqtaýǵa ruqsat beredi. Mysaly, adamnyń ómirine, densaýlyǵyna, mal-múlkine, bala-shaǵasy men otbasy múshelerine áldebir zalal keletin bolsa, sharıǵatymyz onyń meshitke kelip, bes ýaqyt namazdy jamaǵatpen oqýyn, tipti juma namazǵa qatysýyn mindettemeıdi.
Barsha musylman qaýymyn sabyr saqtaýǵa, orynsyz úreılenbeýge jáne Alla Taǵalaǵa minájat etip, ıstıǵfar aıtyp, duǵa etýge shaqyramyz. Alla Taǵala barshamyzǵa razy bolyp, duǵa-tilekterimizdi qabyl etkeı! Ámın!
Jaqııa qajy ABDÝLLAULY,
«Yryskeldi qajy» meshitiniń bas ımamy
