ISLAMNYŃ JÚREKTERDI JAÝLAÝY
قَالَ رَسُولُ اللهِ صَلَّى اللهُ عَلَيْهِ وَسَلَّمَ: لَا يَبْلُغُ عَبْدٌ حَقِيقَةَ الْإِيمَانِ حَتَّى يَخْزُنَ مِنْ لِسَانِهِ. (طص)
Paıǵambarymyz (s.a.ý.) bylaı deıdi: “Bir qul tilin (jalǵan, paıdasyz sózden) saqtamaıynsha kemel ımanǵa qol jetkize almaıdy”. (Tabaranı, ál-Mýjam ýs-saǵır)
Islamnyń alǵashqy jyldarynda jaý bolyp, keıin musylman bolǵan jáne dinniń taralýyna kóp qyzmet etken máshhúr tulǵalar bar. Mysal úshin:
Ábý Súfııan ıbn Harb (r.a.) Mekke múkárrámáǵa musylmandar kelerde Islamdy qabyldap, qalanyń berilýine kóp kómegi tıgen. Keıin Hýnáın soǵysyna jáne Taıf qorshaýyna qatysqan. Hýlafa Rashıdın zamanynda Iármúk soǵysynda júz elý myń kisilik Vızantııa armııasymen urysqan jetpis myńdyq Islam áskeriniń qatarynda bolǵan, olarǵa kúsh-qýat berý úshin Quran kárim oqyp turǵanda jaralanyp, bir kózinen aırylǵan.
Halıd ıbn Ýálıd (r.a.) Hýdáıbııá kelisiminen keıin Paıǵambarymyz (s.a.ý.) ýmra jasaǵan jyly Islamdy qabyldaǵan. Mekke múkárrámány alýǵa qatysqan, qalaǵa kirerde jaýdyń shabýylyna ushyrap, qaramaǵyndaǵy jasaǵymen olardy ydyratqan. Arabııanyń biraz jerin putqa tabynýshylyqtan tazartqan, Sáıfýllah ataǵyn ıemdengen, Vızantııa jáne Iran elderin baǵyndyrǵan Islam áskerine qolbasshylyq etken.
Paıǵambarymyzdyń (s.a.ý.) nemere týys ári sút baýyry bolǵan Ábý Súfııan ıbn Harıs Mekke múkárrámá musylmandarǵa berilmeı turǵanda Islamdy qabyldaǵan. Uıattan basyn kóterip Paıǵambarymyzǵa (s.a.ý.) qaraı almaǵan. Mekke múkárrámá berilgende Paıǵambarymyzben (s.a.ý.) qatar júrgen. Hýnáın soǵysynda musylmandar shegingen alǵashqy kezeńde ásker qaıta esin jıǵansha Paıǵambarymyzdyń (s.a.ý.) qasynan bir eli ajyramaǵandardyń biri. Paıǵambarymyz ol úshin qaıyr duǵasyn jasap, jánnatpen súıinshilegen: “Seni Hamzanyń ornyn basatyn bolatyn shyǵar dep úmittenemin” degen.
Ýahshı ókinip istegen qylmysyna oraı, ımanynyń qabyl bolyp-bolmaıtynyn Paıǵambarymyzdan (s.a.ý.) suratady jáne jaýap alǵan soń Islamdy qabyldap, túrli soǵysta Islamǵa qyzmet etken. Tipten din dushpany Músáılámá Kázzabty óltirgen, “Musylman bolmaı turyp adamdardyń qaıyrlysyn (Hamzany) sheıit qyldym, al musylman bolǵan soń adamdardyń eń jaýyzyn óltirýge qol jetkizdim” degen.
