ISLAM LAŃKESTIKTI QOLDAMAIDY
Barlyq maqtaý men madaq búkil álemderdiń Jaratýshysy Allaǵa bolsyn. Onyń ıgiligi men sálemi eki dúnıeniń sardary, adamzattyń ardaqtysy, súıikti paıǵambarymyz Muhammedke, onyń otbasyna jáne de Qııametke deıin onyń artynan izgilikte erýshi úmmetine bolǵaı!
Qasıetti Quranda Alla Taǵala bylaı dedi:
«Kimde-kim kisi óltirmegen nemese jer betinde búlik shyǵaryp, buzaqylyq jasamaǵan beıkúná jandy naqaqtan-naqaq óltirse, búkil adamzatty óltirgendeı bolady. Sondaı-aq kim bireýdi ólimnen qutqaryp qalsa, búkil adamzatty ólimnen qutqarǵandaı bolady. ...» («ál-Máıda» súresi, 32 aıat).
Bul aıattan Alla Taǵalanyń aldynda barlyq jandar jynysyna, jasyna, áleýmettik jaǵdaıyna, ulty men násiline qaramastan teń ekenin kórýge bolady. Sol sebepti Islam dini boıynsha adamdy óltirý – aýyr kúnálardyń biri bolyp tabylady.
Abdýlla ıbn Masǵýd (oǵan Alla razy bolsyn) paıǵambarymyzdyń (oǵan Allanyń salaýaty men sálemi bolsyn) bylaı degenin jetkizedi:
«(Qııamette) Eń birinshi qazylyq qantógis jasaǵandarǵa júrgiziledi».
Álemniń keıbir elderinde oryn alyp jatqan oqıǵalardy kórip adamdar qatelesip musylmandardy lańkestermen baılanystyrady. Shyn máninde asyl dinimiz jaratylystyń kez kelgen túrin joǵary baǵalaıtyny sonshalyq, adam balasyn ǵana emes, jan-janýarlardy, tipti jándikterge zııan tıgizýge tyıym salady.
Ardaqty paıǵambarymyz (Allanyń oǵan ıgiligi men sálemi bolsyn) bir hadısinde jalǵyz ózi saparda qatty shóldep kele jatqan kisiniń qudyqqa kez bolyp, ishine túsip sý iship, shólin qandyryp, qaıta shyqqanynda, shól qysqannan ylǵaldy topyraqty jalap turǵan ıtti kórgendigin, sosyn «Meniń basyma kelgen jaǵdaı bunyń basynda da bar ǵoı!» – dep, qudyqqa qaıta túsip, aıaq kıimin sýǵa toltyryp alyp shyǵyp, ıtke sý berip, shólin qandyrǵanyn, onyń bul isine Alla Taǵala razy bolyp, kúnálaryn keshirgendigin jetkizdi. Sondaı-aq, bir mysyqty baılap qoıyp, ashtan óltirgen áıeldiń tozaqqa túskendigi de rıýaıat etiledi.
Islamnyń ósıetterine qaıshy lańkester óz áreketterimen dinaralyq arazdyqty qozdyrady. Dinı urandardyń artyna tyǵylyp, qasıetti dindi qorlaı otyryp, barlyq adamzatqa, ultyna, dinine qaramaıtyn úlken qasiret ákeledi. Nátıjesinde ártúrli dinder qatar beıbit ómir súretin qoǵamǵa kelispeýshilik ákeledi.
Alla Taǵala adamdardy beıbitshilik pen tatýlyqqa shaqyrsa, lańkester,
kerisinshe, buzǵynshylyqty jaqtaıdy. Nelikten? Óıtkeni belgili bir saıası toptardyń dindi búrkemeleý arqyly jasaıtyn las isterin keıbiri bilse, keıbiri bilmeıdi. Naǵyz dinniń joly osy eken dep túsinedi. Lańkestik áreketterdi uıymdastyrýshylar ózderin kináli sanamaıdy jáne árqashan ózderiniń durys ekenin dáleldeýge tyrysady.
Taqýalyqqa boı aldyryp, Jaratýshyǵa moıynusynǵan pende adamdardyń janyna qııanat jasamaıdy. Beıkúná jandarǵa, balalar men áıelderge qarsy qarý kótermeıdi. Ózińdi de ózgeni de qurtýǵa shaqyratyn bul qandaı din? Biz mundaı dindi bilmeımiz!
Islam dini boıynsha ózińe de ózgege de zııan tıgizýge tyıym salynǵan. Bizden shynaıy musylman kim dep suraǵan kezde, Alla elshisiniń (s.ǵ.s) «Naǵyz musylman – ózgelerge tilimen de, qolymen de zııan tıgizbegen adam» degen hadısin keltiremiz.
Islam men lańkestik – múldem qarama-qarsy uǵymdar. Alla Taǵala beıbitshilik pen jaqsylyq, ádildik qurýdy jáne adamdar arasyndaǵy kelisimge umtylýdy buıyrady. Al, terrorızmniń maqsaty – zorlyq-zombylyq, kisi óltirý, qoǵamdy úrkitý jáne t.b.
Lańkesterge, olarǵa kómektesetinderge, sońynan ergenderge eshqandaı aqtaý joq!
Paıǵambarymyz Muhammed (oǵan Allanyń salaýaty men sálemi bolsyn) bizge árqashan úlgi. Ol Mekkede turǵan kezinde qala turǵyndarynyń qorlaýyn, adamgershilikke jatpaıtyn qarym-qatynasyn bastan keshirdi. Biraq, Alla elshisi (s.ǵ.s.) árqashan danalyq pen shydamdylyq tanytty. Tipti, Mekkege úlken kúshpen oralǵan kezde de keshirimdilik tanytyp, erkindik berdi.
Mádınaǵa qonys aýdarǵan paıǵambarymyz (oǵan Allanyń salaýaty men sálemi bolsyn) ortaq qundylyqtar negizinde bir-birine degen óshpendilik pen ashýdy jeńe bilgen kópultty, kópkonfessııaly qoǵam qura bildi.
Alla elimizdi, jerimizdi lańkestik áreketterden saqtasyn dep tileımiz. Ámın!
Qabdysalym Rahymqazy
