Imandy adamnyń belgisi – Allanyń sózine toqtaǵany
Tabıǵınderdiń úlkeni, áıgili ǵulama Máımýn ıbn Mıhran[1] úıinde syıly qonaqtaryn kútip jatady. Qyzmetshi áıel (kúń) ystyq sorpa ákele jatyp aıaǵy súrinip ketedi de sorpany Máımýnniń ústine tógip alady.
Birden ashýǵa býlyqqan Máımýn ornynan atyp turǵan ýaqytta, qyzmetshi áıel qorqynyshtan dirildep ketip: «Olar (musylmandar) – ashýlaryn jeńýshi»[2] dep Qurannyń aıatyn oqyp jiberedi. Sonda Máımýn kilt turyp qalyp, «ashýymdy jeńdim» deıdi de kıimin qaǵady.
Sál-pál batyldyq jınaǵan kúń aıattyń «adamdardy keshirýshi» degen jalǵasyn oqıdy. Ashýy pyshaq keskendeı sap tyıylǵan Máımýn kúńine rızalyq tanytyp, «jaraıdy keshirdim» degeninde, «Alla ıgilik jasaýshylardy jaqsy kóredi» dep aıatty támámdaıdy. Kúńniń tapqyrlyǵyna qapysyz rıza bolǵan Máımýn «Onda saǵan jaqsylyq jasaıyn, Alla rızalyǵy úshin sen azatsyń» dep, kúńdi azat etip jiberedi[3].
[1] Ábý Aııýb, Máımýn ıbn Mıhran ál-Jázárı, Tabıǵınderdiń úlkenderinen. Hadıs, Fıqh iliminde ozat bolǵan. Birneshe sahabıden hadıs rıýaıat etken. Hıjrı 37 jyly (M. 657) jyly Kýfada týylyp,Rıqqa qalasyna ornalasqan. Omar ıbn Abdılazızdiń balalaryn tárbıelegen. Birneshe jyl qazylyq mindetin atqaryp, hıjrı 116 jyly, (M 734) Jazırada qaıtys bolǵan.
[2] «Álı Imran» súresi, 134-aıat.
[3] Qýrtýbı, Álı Imran súresi, 134-aıat tápsiri.
