IMAMDYQ

Imamdyq ekige bólinedi: «ımamatý kýbra» úlken ımamdyq, ıaǵnı memleket basshysy jáne «ımamtý sýǵra» kishi ımamdyq, ıaǵnı namazdaǵy ımam. Fıqh kitaptarynda kóbinese namazdaǵy ımamdyq jaıly aıtylady. Bul jerde aıtylatyn másele kishi ımamdyq, ıaǵnı namazdaǵy ımamdyqqa baılanysty bolmaq.

 Imamda bolýy kerek sharttar:

1)  Musylman bolýy kerek. Imansyz, kápir adam bola almaıdy.

2) Aqyl-esi durys bolý kerek. Aqyl-esi durys emes adam jamaǵatqa ımam bola almaıdy. Sonymen qatar aljyǵan adam men araq iship mas bolǵan adamdar da ımam bola almaıdy.

3) Balıǵat jasyna tolý kerek.

4)  Er kisi bolýy kerek.

5) Dáreti tolyq ári boıy nájisten taza bolýy kerek. Dáreti joq nemese ústine nájis juqqan adamnyń ımamdyqqa ótýi durys emes. Fıqh ǵalymdarynyń kópshiligi ımam nájis juqqanyn bilsin ıa bilmesin namazy durys sanalmaıdy degen.

6) Úzirden taza bolý kerek. Imamda úzdiksiz muryn qanaýy, jel shyǵýy, kishi dáretin ustaı almaýy sekildi úzirler bolmaýy kerek.

7) Imamnyń Quran oqý qyraaty durys bolý kerek. Áripterdi shatastyryp durys oqı almaıtyn, bir dybysqa tili kelmeıtin, saqaýlardyń ımamdyǵy durys oqı alatyndarǵa jaramsyz. Óıtkeni mundaı jaǵdaıda jamaǵat pen ımamnyń deńgeıi teńespeýde.

8) Basqaǵa uıyǵan bolmaýy kerek. Jamaǵat namazyna keshigip, qalǵan rákattaryn tolyqtyryp turǵan adamǵa uıýǵa bolmaıdy. Óıtkeni ol basqa bir ımamǵa uıyǵan. Iaǵnı nıetin ımamnyń nıetine baılanystyryp, namaz oqyp tur[1].

 9) Paryz namazyn qaıta oqyp turǵan bolmaýy kerek. Hanafı, malıkı jáne hanbalı mázhabtary boıynsha, ımam jamaǵat saýabyn alý úshin oqyp qoıǵan paryz namazyn qaıta oqyǵan jaǵdaıda basqa bireýge ımam bola almaıdy. Óıtkeni ol paryz namazyn oqyp qoıdy, ekinshi qaıtara oqyǵan namazy nápil namaz bolyp sanalady.

10) Mylqaý nemese Qurandy oqý bilmeıtin bireý Qurandy durys oqı biletin bireýge ımam bola almaıdy.

11) Kıimi joq bireý kıimi tolyq bireýge ımam bola almaıdy.

12) Namazdy ısharatpen oqýshy, namazdyń paryzdaryn oryndaıtyn bireýge ımam bola almaıdy.

13) Nápil namazyn oqıtyn adam paryz namazyn oqıtyn adamǵa ımam bola almaıdy.

[1] Ibn Hýman, fathýl-qadır, 1/277.

Istochnık: http://fatua.kz/kz/post/view?id=147