ILAHI QUDIRET: ÓLGEN SOŃ TIRILTÝ
Baqara súresiniń 259-shy aıatynda baıan bolǵan jáne júz jyl óli kúıde jatqan soń tiriltilgen adamnyń Úzáıir aleıhıssálam bolǵany tápsirlerde jazylǵan. Bul oqıǵa jurtqa aqyretti jáne ólgen soń tirilý syryn túsindirýge taptyrmas mysal. Bul aıat bylaı tápsirlengen:
Zalym patsha Býhtýnnasr Kýdús aımaǵyn basyp alyp kúıretedi, halqynyń birazyn óltirip, birazyn tutqynǵa alady. Tutqyndardyń arasynda jas Úzáıir de bolady. Babylda bir zyndanǵa tastalady. Keıin ol jerden qutylyp óziniń burynǵy otany Kýdúske barǵanda, ol óńirdiń tolyq qıraǵanyn, ıesiz dalaǵa aınalǵanyn kórip qatty muńaıady. “Alla Taǵala myna kúıregen aımaqty endi qalaı, qashan qalpyna keltiredi? Muny qaıtadan burynǵy kúıine keltirýdi maqsat ete me?” deıdi.
Alla Taǵala onyń tilegine oraı, bul oqıǵany qudirettiń keremeti retinde búkil adamzatqa kórsetip, baıandaý hıkmetine negiz úshin ol adamdy júz jyl óli kúıde qaldyryp, sosyn qaıta tiriltken.
Ol kisi ólgen soń jetpis jyldan keıin Kýdústi bir parsy ámirshisi basyp alyp, qaıta qalpyna keltirip, Israıl áýletiniń qalǵandary qaıtadan sonda jıylady, qalǵan otyz jylda ol jer qaıta kórkeıgen aımaqqa aınalady.
Júz jyldan soń Alla Taǵala Úzeıir aleıhıssálamdy qaıta tiriltip, bylaı deıdi: “Mundaı kúıde qansha ýaqyt jattyń? Basyńnan qandaı kúı ótkenin bilesiń be?”
Ol ózin uıyqtap turǵandaı kórip: “Bir kúndeı nemese sonyń bir bóligindeı boldym” deıdi. Túsinetinimiz, ómirde ótken júz jyldyq ýaqyt, aınalyp kelgende, adamǵa bir-aq kúndeı keledi.
Úzáıir aleıhıssálamnyń bul jaýabyna Alla Taǵala:
“Joq, júz jyl. Bul aralyqta sen óli boldyń. Qazir kezinde qasyńda bolǵan as pen sýǵa qara, olardyń eshbiri búlinbegen, olar osy júz jylda sol qalpy saqtalǵan. Endi esegińe qara, ol qandaı kúıde, kúl-parsha bolǵan súıekteriniń túrin kór. Seni ajalyń kelgennen keıin emes, jurtqa aıat qylý úshin, tek ǵıbrat úshin solaı óltirip tirilttik. Seni ólimnen keıin adamdardyń bárine dálel qyldyq. Súıekterge qara, olardy bir-birine qalaı qosamyz, bárin qaıtadan ornyna qalaı qaıtaramyz, sonan soń olarǵa et kıgizemiz, bárin burynǵy qalyptaryna keltirip, ómirge jetkizemiz. Myna súıekter ajyrap bólshektengen, qýrap etten aırylǵanda ılahı qudiretpen qaıtadan burynǵy kúıine kelip, bul aıqyn kórinis tapqan.
Qaı kezde de bul aqıqatty, ıaǵnı ólgenderi tiriltý máselesin jáne Alla Taǵalanyń kemel qudiretin ol kózimen kórip, kýá boldy. Bylaı dedi: “Men bilemin, Alla Taǵala sóz joq bárine qudiretti. Rasynda búkil ólgenderdi qaıta tiriltýge–ámánna- qudiretti. Ólgenderdiń qalaı tiriletinin oılaǵanym buǵan Ilahı qudirettiń jetip artylatynyn bilmegenimnen emes. Bálkim bul qaıta qalpyna kelý taǵdyr shyǵar? Taǵdyr bolsa qandaı úlgide oryn alatynyn bilýge qyzyǵýshylyqtan bolar. Áıtpese Alla Taǵalanyń bundaı túrli ǵajaıypty, teńdessiz keremetti jaratýǵa qudiretti ekendiginde shúbá joq”.
Qysqasy, ol adam da qaıta tirilgende úsh ǵajapty; ári óziniń, ári súıekterdiń qaıta tirilgenin kórgen, ári el-jurtynyń qaıta jandanǵanyna kýá bolǵan. Alla Taǵalanyń mundaı sansyz ǵajaıypty jaratqanyna, áli de jaratyp jatqanyna daý joq. Mine, bul aıatta osylardyń birin bizge osylaı jetkizgen.
