Ǵıbadattyń barlyǵy tárbıe úshin

Ýnıversıtetimizdiń ustazy doktor Madıh bir ýaǵyzynda bylaı dep edi:
Negizinde Alla Taǵala quldaryna bes paryzdy mindetteýinde úlken danalyq bar. Sebebi, Jaratqan Iemiz bizdiń ǵıbadamyzǵa muqtaj emes. Bul ǵıbadattar biz úshin ıaǵnı, solardy óteý arqyly Allanyń rızashylyǵyn alýymyz úshin qajet.
Sondaı-aq júris-turysymyzdy (sýlýk), ádebimizdi jóndeý úshin kerek. Sebebi, mysaly tań namazyn oqyp, besin namazyna deıingi aralyqta bireýdiń aqysyn jesek, bireýdi tilmen, qolmen renjitsek, meıli ol musylman bolsyn, basqa din ıesi bolsyn, besin namazyna Allanyń aldynda qalaı turamyz?! Álbette, uıalǵannan, qoryqqanymyzdan jerge kirip kete jazdaımyz.Imandy  musylman bolsa, dereý qatesin jóndeýge asyǵady. Sol sııaqty, oraza kezinde tilimizdi, kózimizdi, qulaǵymyzdy, ıaǵnı, barlyq dene múshelerimizdi jaman nárseden tyıamyz. Ómirimizde bir ret jasalatyn úlken qajylyqta da jamandyqtan tyıylýymyz paryz.
Zeket, sadaqa bergende de mindetsinip, tákapparlanbaı, kishipeıil sıpatpen, Alla saǵan osyndaı múmkindikti bergenine shúkir etý mindet.
Qarap otyrsaq, ǵıbadattardyń barlyǵy - adamdy tárbıeleý úshin paryz etilgen. Qajylyqqa barǵanda, taýap kezinde ásirese, Qaǵbany aınalý, qara tasty súıý kezinde keleńsiz jaǵdaılar kóp oryn alady. Jaratqan Iemiz ǵıbadattyń qabyl bolý shartyn sózge emes, nıetke baılaǵan. Sondyqtan, ár amalymyzdy Allanyń rızashylyǵyn alý nıetimen jasaýymyz lázim. Qajylyqta júrip, bireýge zııan tıgizýge bola ma?
Kezinde Hazreti Omar halıfa (Alla odan razy bolsyn) musylmandar osyndaı kúnáǵa batpas úshin, Qaǵbany taýap etý kúnderin er adamdarǵa bir kún, áıelderge bir kún, balalarǵa bir kún, jarymjan, densaýlyǵy nashar adamdarǵa bir kún dep belgilegen eken. Rasynda, bul - ǵıbrat alatyn nárse ǵoı.
Toqsan aýyz sózdiń tobyqtaı túıini, Paıǵambarymyz (Allanyń salaýaty men sálemi oǵan bolsyn):
«Men kórkem minezdi kemeline jetkizý úshin jiberildim»(Ibn Mája) dep aıtqandaı, Jaratqan barshamyzǵa kórkem minezdi bolýdy násip etsin!
Qýat Qabdolda