EI, JAN - ShYRAǴYM, LÁ TAHZAN!
Lá tahzan!
Muńaıma, Jan!
Júregińdi jaralasa áldekim
Sen muńaıma, Jaryǵym!
Tek jaraly júrektermen birgemin
Demep pe edi Táńirim?!
Endeshe, tek sen muńaıma, Jaryǵym!
Sen odan da túnniń qoınyn jaryp shyq,
Kúndeı bolyp
Janarlardy qaryqtyrsyn jaryǵyń!
«Derttimin men» deımisiń?
Ash kózińdi, qyraǵym,
Bilmeımisiń:
Dert – Jaryńa jetkizetin pyraǵyń,
Dert – moınyńa asyp júrgen tumaryń,
Sende ǵana bar dep jáne oılama,
Sendeıler bar, ańsap júrgen syńaryn,
Kókiregi kúrsinetin qumar ún.
Sen shaldyqqan osynaý dert –
Haqqa sert –
Bireýlerge asqan nyǵmet, shyraǵym.
Úmitińdi úze kórme,
Júsipti eske al, Asylym.
Dertsheń jerdiń shıpasy bar,
Órtsheń jerdiń zıpasy bar jasyryn.
Joqshylyqtyń nyǵmeti bar,
Saýal týsa jaýaby bar,
Sen tarsynba joqshylyqtyń lashyǵyn.
Keme soqsań, sý da shyǵar aldyńnan
Izde sýdy, shólde, órten, asyǵym.
Sonda jerdiń asty-ústinen atqylap
Sýǵa tolar qoıny taý men tasynyń.
Dúnıeniń mal men múlki pádári –
Bir jymısa jannan artyq Ǵashyǵyń.
Qara oǵan, biraq ańsap, mas bolma, –
Bil Dúnıeniń masylyn.
Teńiz syımas ózen-kólge,
Muhıt syımas teńizge.
Ǵashyq bolmaı, «Men», «Sendi» uqpas,
Túsindirme kemiske.
Haqqa jeter jol bar deseń,
Senbes eshkim lebizge,
Júreginde nury joq jan janbas ózi, jana almas,
Jáne-daǵy jan bere almas egizge.
Lá tahzan!
Qaıǵyrma, Jan!
Aıaǵyńnyń synǵanyna qaıǵyrma,
Bálkim, Allam synǵan aıaq ornyna
Qanat berer, qanatyńdy jaıǵyn da,
Samǵa kókke, tek tómenge qaıyrylma.
Qulap tússeń qudyqqa
Oǵan-daǵy qaıǵyryp tek moıyma,
Bilseń, synaq túsedi erdiń soıyna.
Shyńyraýdan shyqqannan soń Mysyrǵa
Sultan bolǵan Júsipti al oıyńa.
Qalaǵanyń oryndalsa – bir qaıyr,
Oryndalmaı qalǵan bolsa – myń qaıyr,
Kúdik-kúmán jaqyndatpa boıyńa!
Ótkeniń men keleshegiń – shyndyǵyń
Al Aqıqat – bireý-aq.
Tús kórgendeı bil jalǵannyń sumdyǵyn,
Tek senimiń tireý – haq.
Sondyqtan da kúmándanba, quldyǵym,
Sen – bulbulsyń,
Al bulbulsyz – júdeý baq.
Aıaq-qolyń kesilse eger túsińde,
Oıanǵanda, orny tolar, qoryqpa!
Basqa túsken myń bir bále úshin de
Qaıǵy jutyp, zoryqpa.
Bir ózińe tap berse de qalyń qol,
Taǵdyryńnyń ózgeretin sáti sol –
Dál sol tustan Sen daıynsyń joryqqa!
Bul ǵalamnyń kitaby – Sen, maǵan sen,
Ózińdi ash ta, oqy Ózińdi, tolyqta!
Tek toryqpa!
Qaıda deseń bul ǵalamnyń
eń alys bir núktesi,
Ol da seniń óz ishińde, sózimniń joq búkpesi.
Biraq sony baıqamaısyń,
Bar deımisiń dertti kúnniń ótpesi.
Dertiń qandaı bolsa-daǵy,
kóz jasyńdy tókpeshi.
Tek úmitiń Alla bolsyn,
Tas túıilgen ıman jibin sókpeshi.
Biri qalmaı áldenege el súıenip jatqanda
Súıeneriń Rabbyń bolsyn, basqadan syı kútpeshi.
Eshbir kúná Raqymannyń Raqymynan kúshti emes
Sonda-daǵy ǵapyl bolma,
Jıǵanyńdy tókpeshi...
Lá tahzan!
Qaıǵyrma, Jan, tirisiń!
Dertiń qandaı bolsa da bir dáret al,
Keńip qalsyn tynysyń.
Jaınamazdy jaıyp al da, menshikte
Bólmeńniń bir buryshyn.
Namaz oqy qalasań,
Qalamasań eshteńe aıtpa...
Tyńda júrek dybysyn.
Ol dertińdi senen artyq túsiner
Biletin Sol – sen úshin ne durysyn.
Duǵa etkende sol jaraly júregińniń jaı qolyn
Bolsyn jalǵyz duǵa tileý – jumysyń.
Óıtkeni Onyń meıirimi:
Tek jaraly júrekterge ushady,
Tek jaraly júrekterdi qushady,
Bilmeımisiń muny shyn?..
Kilem qaǵý – urý emes, shańyn qaǵý tazalap,
Alla seniń qaǵyp jatsa shańyńdy
Qaıǵyrmashy, quryshym!
Lá tahzan!
Muńaıma, Jan!
Bir sharýań tappaı jatsa sheshimin,
Sen muńaıma, esilim.
Odan jaqsy is kútip tur,
Ne bolmaýy tıis dep bil ol isti, –
Tıgizbeske kesirin,
Qaıyrly dep túsin Haqtyń kesimin.
Ushqan qusqa qara bir sát,
Eshteńe ekpes, egin ormas, nesi min?
Kim beredi sol qustardyń nesibin?
Seni umyta qoımas Rızyq Iesi,
Tek ishińnen qaıtalaı ber Esimin.
Kúndiz-túni bále jaýar adamǵa,
Tek ǵashyq jan soǵan tózer, shaǵym aıtpas zamanǵa.
Ǵashyq úshin dert – bir turaq joldaǵy,
Ony kórseń, yshqyń artar, «qaıǵy ber dep maǵan da».
Kerýeni kelse-daǵy qaıǵy-derttiń qaı tustan,
Jeke bastyń dertinde emes,
Jar dertinde bolar ǵashyq ámanda.
Sen de, janym, amalda.
Jasalýyń – kúıreýde tur,
Al birlikti – bytyraýdan tabasyń,
Túzelýiń – qıraýda tur,
Al murattyń – muratsyzdyq panasy.
Bar álemiń – Joqtyqta tur,
Al teristeý – bekitýdiń sharasy.
«Lá ıllaha ıllalla» de, –
Júregińniń jazylady jarasy.
Qandaı qıyn adam úshin Aqyl-Júrek arasy,
Bolmasa eger tarazy.
Qandaı jaman bir ýaqytta
Jıyrylsa sát pen ǵasyr arasy,
Al adamnyń bar bilgenin jetkizýge kelmeı qalsa shamasy.
«Men» dep únsiz qalýy,
«Sen» dep, únsiz kózine jas alýy,
Taýsylǵanda sharasy.
Muńaıma, Jan,
«Menmin» deseń, bekersiń.
Al eger de Haqty «Bar» dep,
óz Menińdi joq qylsań,
Shyn Barlyqqa jetersiń.
Menmendikten arylǵanda
Bar bolǵanyń sonshalyq,
Tarǵa syımaı ketersiń.
Dál sol sátte seni saǵan sensiz hálde kórseter,
Sen Ózińe tolyq Óziń jetersiń.
Lá tahzan!
Qaıǵyrma, Jan, sabyr et!
Mahabbattyń bir esimi – Sabyr-dúr,
Sabyr etip úıren, kelse kóktegiń:
Sen ashtyqqa sabyr qylsań,
«oraza» ustap, jemsaýyńdy shektediń.
Azap-muńǵa sabyr qylsań, «tózim» gúlin ekkeniń,
Adamdarǵa sabyr qylsań, «keńpeıildik» etkeniń.
Qalaýyńa sabyr qylsań, «duǵa» bolar ótkeliń.
Sezimińe sabyr qylsań, «kóz jasyńdy» tókkeniń.
Saǵynyshqa sabyr qylsań, «qasiret», «muń» shekkeniń,
Mahabbatqa sabyr qylsań, «ǵashyqtyqqa» jetkeniń.
Ne qalasam,
Men Rabbymnan suradym,
Tek Rabbyma jyladym.
Berse – Onyń ulylyǵy,
Bermegeni – synaǵym.
Sen de tile, bolsa qandaı suraǵyń.
Ne tileseń,
Jar esigin qaǵa bil,
Jaryńa asyq, sarqyp júrek qunaryn.
Ashylmas dep úmit úzbe,
Sol esiktiń aldynda kút tózimmen,
Bil, bir kúni jarq eterin shyraǵyń.
Eı, Jan-Shyraǵym,
Lá tahzan!
Hz. Rýmı
qalyptaǵan Láıli Qundaqbaı
